السبت، 20 أغسطس، 2011

اتوحشتك




عارف!!
 كالعاده نفس الكلمه اللي ببدأ بيها كل كلامي معاك, كاني هقولك اللي عمري ما قلته مثلا !!,( انت بتكسب ثواب كبير انك تعرف حد زيي علي فكره !!) ,صوتك لسه بيرن في ودني و انت بتقول ( هعرف منين يعني ! ما انتي هتعرفيني اهوه لما تقولي دلوقتي !! ) , نفس البسمه اللي كانت بتترسم علي وشي ساعتها , مرسومه دلوقتي!!, شوفت انك فايتك كتير بكونك مش هنا !!!!!, اصلي عارفه ان مهما حصل انك بتحب بسمتي ! , بيني و بينك هي تتحب يعني !!!!!!!!

انا عملت حاجه عبيطه قوي النهارده, و كالعاده بقيت الفتره الاخيره , بحس بقيمه كل تافه في يومي بمجرد اني افتكره و احب اقوله و انا معاك علي التليفون! عملت فولدر باسم ( حميمي ) , وبقيت كل ما ابقي متضايقه من موقف ما , او موقف حابه احكيلك عنه , اكتبه, و اسيبه من غير تواريخ ولا ساعات ولا حتي عناوين, بكره افتكر مريت بالموقف ده امتي و ليه , او بحاول استفز عقلي انه يفتكر لوحده من غير ارقام , اه انا مهندسه!, بس بكره الارقام من النوعيه دي , عكسك !

النهارده كان يوم عادي و ممل و رتيب !, و زي ما بقولك دايما , لزج و ملزق كده , و موقفه مش ولا بد في النتيجه !, فوحشتني قوي و قررت اكتبلك انك وحشني و بس!, فتحت فولدر جديد و قررت اني اكتبلك و اللي يحصل يحصل !, اصل الفكره دي تضمن اقل خساير , انا عارفه انك مشغول اوي اوي اوي , مش حابه اكون حمل عليك !!!

كتبت.... 
بص انا عارفه اني رخمه ,و ما افتكرتكش طول اليوم برساله من بتوعي , اللي دايما بتقول انها بتظبط ملح اليوم !, بس اديني اهوه بصبح عليك ( صباح بطعم المسا , ده اكثر عبقريه علي فكره , لو ركزت شويه يعني !!), و بصلح غلطتي و مستعده اعترف اعترافي المعتاد و انا ببتسم و اقولك (انا اللي اكلت الجبنه)!! , كالعاده بحب اخدك في دوكه علشان تنسي تفتكر اني غلط, لانك اصلا فاكر, بس بصراحه ما بستحملش شكلك و انت مكشر , بيبقي دمك تقيل اوي !!!,
اسكـــــــــــــــــــت!!!
مش قطتنا خربشتني في رجلي اليمين, و انا برمي كوبايه الزبادي في الباسكيت النهارده ,باين كان نفسها في لبن !,طب بزمتك ده كلام يعني ما تقول بالذوق !! ,ولا يعني انا بخيله؟؟ اه اه قول قول شايفني بخيله!!, اخس عليك !!, ابتسمت في الاخر و قلت طولت الغيبه يا حبي مش ناوي ترجع بقي, اكتر حاجه بتثبتلي يوم عن يوم اني فعلا بحبك ! اني بستمتع بين كل ده بكل تافه في يومي معاك , من غير ما احب العب معاك دور البنت الناضجه , اللي فاهمه اللي ما يتفهمش, كتير بيبقي لطيف في رايي اني ما افهمش و اسيبك تفهمني , ليه لا يعني !!
...........
 كان نفسي قوي ( اوي ) اكلمك النهارده , مش عارفه حاسه بقلق عليك ليه ؟, مش هو هو قلقي اليومي لاني مش عارفه اكون معاك دايما!, لا المره دي في حاجه مختلفه !, طول عمري بستغرب, لما كانوا يقولوا الام تعرف تجيب ابنها من وسط مليون باحساسها بالحنان ليه ( قلب الام علي راي اللمبي) كنت بحس انها مبالغه , بس لو مش كده , طيب هو انا ليه حاسه كده بيك او متوهمه بده, او مجنونه احتمال!!

دايما تقولي ( احلي ما فيكي انك مجنونه ) اذا انا مجنونه بقي !, من الجدير بالذكر في اليوم , اني النهارده قعدت احصرني قبلك و بعدك ! و لاني بفكريه هندسيه مهلبيه!! , بحب اوي اشوف ايه المكاسب و الخساير, من وقت للتاني يعني ,مش دايما علشان ما يجيليش كنح في نفوخي !!, حسيت اني معاك , بنت ناس اوي و مستطعماها زي ما بحبها ,من غير لا ملح ولا كمون ولا ايتها حاجه , و ده كفايه اوي عندي !! 
المهم اني برغم اعترافي من حبه اني مجنونه, متفمه جدا انك واحشني, و اني عايزه اشوفك حالا بالا ,و احيي معاك ابو الفصاد, الي اللا نهائيه و ما بعدها , و اني برغم كل ده استحاله اكلمك , لانك مشغول !!!!
 اتوحشــــــــــــــــــــــــــــــــتك!!!!!!!!!!





هناك 3 تعليقات:

Imagineor يقول...

وااااااو ..
بجد ممتعة جدا جدا يا سميحة .. كلها على بعضها تمثلت في هيئة الفولدر الجميل اللي إخترعتيه ، عشان تسرحي فيه أكتر من غير أفكار هندسية و وجع دماغ .. حميمية و جميلة .. البساطة تجدي أحيانا :)

خالد ناجى يقول...

i like that


:)

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول
غلا الروح
شات غلا الروح
شات صوتي
شات مغربي