عرفت

خلينا نكون واقعيين !!

دي جمله بقولها كتير و بكرهني و انا بقولها جدا !! .

لاني مش بحب اوي ابقي واقعيه , لان حلول الست واقعيه  قليله , و مرهقه دايما , و انا بكره القليل و بكره اني اختبر مدي تعبي و ارهاقي رغم اني شباب !!

لكن ما هو لازم ابقي واقعيه علشان علي الاقل اتقبل و اتعايش مع الاخر اللي هيبقي تصرفاته واقعيه !!

( انا رايحه اغير الواقع , تيجي معايا و انا بغير الواقع ) !! :)

ده علي اقل واجب يعني مع الست واقعيه يعني !!

بس انا من وقت للتاني بعرف حاجات عني , حاجات تساعد في بناء البنيه التحتيه ليومي !! و حياتي العامه !!(حبه كلمات مجعلصه  يعني لزوم تنبيه الجزء المجعلص في العقل يعني !!)

عرفت ...

• عرفت اني مريت باسؤ مواقفي التاريخيه الفتره اللي فاتت , خاصه انه تزامن مع خروجي من حاله اكتئاب ملعونه !! ربنا لا يردها يا رب علي قلبي !!, و ان شعوري بالوحده بقي اكبر بعد ما خسرت بمزاجي و غصب عني حد كان اقرب من القريب ليا !! بس بردو عرفت اني شلت من جوايا اخر ذره احساس بالذنب , مع اخر محاوله فشلت من ناحيتي لانقاذ ما يمكن انقاذه !! و قررت اني اتقبل حظي من الكون و ابتسم :) ايوه كدهوه بالظبط  :)

و عرفت حاجات اهم كتييييييييير ...

• زي مثلا  اني عرفت ان كابوس هدومي المركونه علي الكرسي نهارا , علي السرير ليلا , و العكس بالتتابع الزمني اليومي لساعات النوم , و احتياجي نهارا للكرسي للاب , و للسرير ليلا للنوم يعني ( ما هو انا بني ادمايه بردو مع لقب (كائنه ليليه )!! ,ممكن تنكشح كـــــــل الفنكشه دي في مكالمه تليفون طويله شويه , ممله حبه قليله !! .... اكتشفت ان مكالمات التليفون اللي من النوعيه دي بتشجعني اني اقلب الاوضه راسا علي عقب !! لان توتري من السؤال اللي جاي بيروح بحركتي الكتير بين الحجات المتبعتره هنا و هناك , جوايا و برايا . علي الاقل اهوه اللي  برايا اتستف اهون , عقبال الجوانيات بقي !!

• عرفت ان حبي القديم للسلسله بتاعه (مفتاح الحياه) , اللي جاتلي هديه زمان من اخويا سمعه السكره  ( من العظم او العاج مش خشب!!)  و ناس كتير شافتني لبساها افتكرتها صليب ,و فرحت انهم شافوها كده!! .ابتديت احنلها تاني و احن لوقت اعتقدت فيه انها دافيه و بتدفي قلبي فبفرح بسببها مش معاها !! و قررت البسها تاني , انشاله تحت الايشارب !!

• عرفت ان سعاده خلصان كتاب و البدايه في كتاب تاني اروع من كوبايه السحلب في الشتا !!

• و ان اللكلوك بتاعي ابو فروه بمبي بيدفي اوي و شكله مفرح في رجلي و انا بركع في الصلاه , و ان تعليق عمتو عليه باني من الاسكيمو ما زعلنيش علي قد ما خلاني اتسائل ( يكونش صحاب الابتدائي عندهم حق في مقولتهم الهبله بتاعه( اللي ايده دافيه قلبه بارد و اللي ايده بارده قلبه دافي !)!) عامه هم اتكلموا عن الايدين و انا بتكلم عن رجليا فمفيش مقارنه يعني !!

• عرفت ان لون المانيكير بيتبعه لون الروج مش اي حاجه تانيه !! دي كانت معلومه من صاحبه ليا بتهتم بالحاجات دي !! سمعتها منها في حالتي الانتقاليه دي , تبقي تحسب في صالحها يعني ( انا حقانيه يعني )!!!

في اخر حضور ليا لتوقيع كتاب( دون خسائر فادحه ) لحبيبتي ملكه بدر , كتبت في اخر صفحه 
عندما افهم تماما .. ساموت !!
و انا مش ناويه اموت دلوقتي يعني :)