الخميس، 2 فبراير 2012

ان لم اكن مزه !!

 
سؤال وجودي فحواه !!
علي وزن مواقع التجميل و الموضه السخفه الملزقين !!
(اختي العزيزه ,كيف تعلمي انك حسنه المظهر اليوم؟؟)
ازاي تعرفي انك لابسه النهارده مزه ؟؟؟ من الاخر يعني علشان هي مراره واحده !!
انك تلاقي نفسك بيواجهك موقف سيء مع الذات!! , و تتمني تتحولي لشبح و لو لوقت مؤقت بس , يعني نقول مداه مده مشيك لاول الشارع الرئيسي , لانك متوجسه خيفه حد من قرايبك او معارفك يشوفك و يعلق عليكي , او ينقل تعليقه لالبابا ولا الماما طبعا !!!

انك تنزلي من بيتكم في امان الله , يرمي عليكي السلام خمس بياعين في  محلات في طريقك للطريق الرئيسي!! خمسه ليه يعني !! مره واحده !!, كل اللي بيبيعوا فيهم رجاله طبعا !!
مع تحسيس في الصوت و استكانه !! تلاقيهم بيقولولك يعني ما بقتيش تيجي يعني !!
و يبقي ردك لو عرفتي تتكلمي يعني ولم تكتفي بهز راسك و انتي بتقولي في سرك ( لا حول ولا قوه الا بالله!! له في خلقه شئون !!),معهلشـــــــــي مشاغل !!

انك تلاقي كل التكسه اللي تعدي من قدامك تقف ليكي !! و انتي بكل الاطه تشاوري نووو وااااي !!بهز الراس طبعا ومن غير ولا كلمه !!
الاطه اخر الشهر بقي !!

انك تلاقي الميكروباص يقفلك في وسط الشارع لمجرد انك اتمطعتي و انتي ماشيه , مش بتشاوريله يعني ,ولا رميتي نفسك تحتيه لا قدر الله علشان يقفلك كالمعتاد يعني!!, و من غير سباق الماراثون اليومي لانه بيركن بعد المحطبه بتلاته متر  !!. تديله الاجره و هو مبتسم ابتسامه كبيييره و يقولك بجمله سمجه !! خليها علينا المره دي !!.

انك بعد ما تنزلي من الميكروباص تلاقي خمسه بينادولك ( يا انسه يا انسه !!) تبصي تلاقي السواق هووو هووو!! بيقولك العربيه هتخبطك يا انسه خللي بالك !!!
و احيانا يزودها و يقول : لو اللي زيك ماتوا امال الخناشير اللي في البيت نعمل فيهم ايه !!! 

انك تدخلي من باب الشركه متسربعه و بتقولي يا حيطه داريني لانك متاخره كالمعتاد لان الطريق هوباااب !!
 يبتسملك السكرتير من حيث لا تدري ولا تعلمي و يقولك : يعني متاخره مش عوايدك !! انا خايف عليكي يتخصملك بس !! ,بعد ما كان بيجري علي دفتر الحضور و الانصراف و يسجل انك اتاخرتي, و بنفس ام الابتسامه يقولك , كده اتخصملك ربع اليوم , و احيانا تنفرج ابتسامته اكتر و هو بيقولك , المره دي نص يوم !! فالشعب كله يفرح فيكي اخر الشهر بقي و يعيش اصحاب الشركه في امان و سلام نفسي لانهم قللوا علي قد ما يقدروا من المرتبات !! خونه!!

اعزائي الرجال المستفهمين !!!
شايفين مدي الضغط النفسي اللي بيتمارس علينا احنا الغلابه مكسوري الجناح البنات , و بعد كده يزعلوا مننا لو اتاخرنا نصايه قدام المرايه !! معذورين !! ما هم مش عارفين قد ايه المجتمع قاسي علي اللي نازلين متسربعين من بيوتهم ,مش مهتمين بلفه الحجاب اوي , الاي شادو اوي اوي , المانيكير خالص , الكعب العالي نو واي !!
ده حتي و احنا صغيرين ما نعرفش الروج من كوز الدره !! كانوا بيسمعونا اغنيه ماشيه السنيوره !!
عزيزي الرجل المستفهم احنا كبنات عايشين في مجتمع قاسي اوي :(
بلد بتاعه شهادات صحيح :( 
يعني من الاخر ليس علي المزه حرج:(


اذااا ان لم اكن لابسه مزه, لوددت ان اكون لابسه مزه :)
اي و النيعمه يعني:)
 

هناك 7 تعليقات:

khaled nagy يقول...

لذيذه وجميله يا سميحه

rona ali يقول...

فشرررررررررررر
ان لم اكن لابسه مزة فالحمد الله انا راضيه ربنت ومزة في نظرى

بس معاكى حق الحياه قاسيه تلاقي الولد يلبس جزمه مش متلمعه عادى جاكيت غلط عادى انما احنا لازم نكون متلمعين بنات بقي حاجه تجييب الهم

ضحكتينى وانا قاعده من الصبح كل ما اجى اعيط اضحك قطيعه

تاكاشى يقول...

اعتقد ان اهتمام البنت بمظهرها ما يعيبهاش .. لكن اكيد في حاجات كتير بتزيد عن حدها
واى حاجه بتزيد عن حدها بتتقلب لضدها

اعتقد وان كان معاكى حق في نظرة المجتمع للبنت ونظريتك فى التعامل معاها الا ان دا مش مبرر للأفورة

كل شىء في توسطه جميل

اسلوبك جميل يا سميحه حاولى تستغليه في حاجه مسلسله

مهندس استشارى نشات سلامة يقول...

برافو يا سميحة اسلوبك سهل وعفوى وصادق وشجاع حاولى تقراى اكتر وتكتبى اكتر اتنبأ لك بمسقبل باهر فى حالة الاستمرار .. الاستمرار فى الشجاعة والاستمرار فى الكتابة

مهندس عمرو عرجون يقول...

متميزة ومختلفة ولكن بود تحياتى لكاتبة واعدة لها اسلوب ممتع

ابو رنه كبير المدونين يقول...

بعد كل البهدله اللي شوفتيها دي وعايزه تبقي مزه ؟
ايه الغرض من لعب دور الفريسه المطارده الخايفه من عيون الصايدين في كل شارع وزقاق
اقولك تخيلي انك غزاله بيجذبو بيها اسد جعان وعاملين يقربوها منه ويحلوها في عنيه وهو بيهبش في الهوا وعنيه بتقول لو طولتك نيهاهاهاها
نسمع بقي راي الغزاله ؟

عرفة فاروق عبد لله يقول...

أنت بالفعل مزة