ترقص !!

محاوله إرضاء الأخر!!

جحيم علي الأرض !!

هي اول خطواتك لان تصبح مريض بانفصام بالشخصيه , لانك باقل تقدير تتلبس روحه و فكره و طريقه تحليله للمواقف , لتقتنع بالاساس ان كنت خطأ ام صح بمنظوره , و من هنا تبدا في تحليل فكر شخص كهذا ,  كيف تستميله لتصل الي ما ترغب به من حوارك معه , اللي بالتاكيد عقيم!!.
.
.
.
من شب علي شيء شاب عليه !!!!. فكره انك تتغير لحد او علشان حد , مش مقنعه و مش انسانيه و محتاجه بال طويل !!
.
.
.
ده ان كان باختيارك اختيار الشخص ده او لا!! , هيبقي الاسهل انك تعلن العصيان و تقول سلام !!مش لاعب !!

طيب لو مجبر عليه في حياتك !!

الاجبار مش شرط علاقات اسريه , ممكن مشاعر تربطك بيه رغم عدم توافقكم الفكري اللي متعارف عليه منكم الاتنين !!

هيبقي ساعتها الخيارات اللي قدامك !!

 يا تكفر بحياتك و تعيش مكتأب بنص روح 

          يا تكفر بأحقيه وجوده في حياتك و تخليه ملغي رغم وجوده 

                 يا تكفر بكونك من حقك تبقي انت بجنانك بعقلك بفهمك بغبائك !!

   دائما و ابدا العلاقات الانسانيه هي اكثر العلاقات تعقيدا !!!

العلاقات الرياضيه ايا كانت درجتها اسهل بكتير , بتعتمد علي قوانين ثابته جدااو كونها ثابته خلاها مقنعه!!

دي معلومه اتقالتلي من تقريبا عمر العشر سنين , كان قدامي ساعتها قرارين اما اختار الطريق الاسهل فاقول مش لاعبه , اما العب و اسامح في كوني احتمال اخسر , لان خسارتي لمره ممكن تبقي السبب اني اكسب مرات تانيه !!

وجهه نظري دايما ان احقيتي في الاستمتاع بالسعاده معتمده علي مدي تحملي لمراره المواقف التانيه , لان صعب تلاقي حياه مع اي كائن علي وجه الارض علي وتيره واحده , و الا هتصاب بالملل بردو !!

إحنا كائنات صعبه الإرضاء و ملتفه حوالين نفسها !! 

فكره السعاده المطلقه هلاميه زي فكره التعاسه المطلقه بردو !!, يبقي الموقف من وجهه نظري مجرد استعمال ادمي لاغنيه  الدنيا زي المرجيحه يوم تحت و فوق!! , بس الاكيد ان مش كل الناس بتعرف ترقص , و لا كلهم عندهم الهدوم المناسبه للرقص اصلا !!
علشان يبقي رقص علي الاقاع و مقنع للناظر !!
 يعني صعب تلاقي بلارينه بفستان منفوش و و شعر مرفوع و سمو روحي ,  بترقص علي اغنيه شعبيه في الشارع بمطوه مثلا !!

اول خطوه انك تختار الزي المناسب !!
 بعدها تختار الاغنيه المناسبه للزي اللي لابسه !!
 بعدها علي طول تفكر هي رقصتي دي صالحه للعلن و لا ليا انا و بس !!, مش كل الناس بتعرف ترقص قدام الناس !!
بعدها تفكر مين مسموحله يشوفك بترقص , و مين مسموحله يرقص معاك !!

لو طموح هتفكر يبقي عندك اكتر من زي لاكتر من رقصه !!
طموحك ممكن يسوقك انك يبقي عندك اكتر من شريك للرقص, بما انك عندك اكتر من زي و اكتر من رقصه !!
لو انسان تقليدي التفكير هتتصالح مع فكره انه يرقص معاك مره و المرات التانييه يبقي مجرد مشاهد بيسقف !!
.
.
.
.
من زمان ملقتش اجابه لكل سؤال ليه سألته !! ,كان الاسهل تكفيري و تحويلي لمخله للنظام , النظام المتعارف عليه و ليس المستحب إتخاذه !لاني ما اخترتش اخد ده و اسيب ده !, قررت اقري في الفلسفه لان فيها اجابات لكل سؤال , تقريبا , خليتها منهج تفكير , كانت اول وسيله اني (ابسطها فاستبسطها )علي راي حد بعزه اوي !!!
.
.
.
اذا...............
 بدل تضييع عمر علي عمري !!
بما اني نجحت اختار فستاني و كعبي العالي و تسريحه شعري !!!
و اخترت لقب غجريه لانه يناسبني !!
اتبقي اني اختار شريك الرقصه !!

ها بقي تقبل ترقص معايا !!!
يعني علي راي منير
ترقص ؟؟

يوم عادي!! معايا !!

احم احم احم
بتنحنح لاني مش عارفه اقول كلامي بانهي روح , اصل جوه الجسم ده ( اللي هو انا !!) ارواح كتير , مش اشباح ولا توفي !!!!
 بس هي النظريه !!!
انهي طريقه هتبقي اكتر افهاما للمتلقيين !!!
عاده بفكر في كل ده قبل ما اكتب كلمه واحده ! و ده اللي بيخليني عاده ما اكتبش ولا كلمه !
احيانا لاني اللي عايزه اكتبه اكبر من انه يتقال في كلام !! هو كم طاقه لا بيتجمع بازايز و لا في اي حاجه ماديه !! و لو فكرت اصيغه بيطلع دايما في رايي اتفه و اتفه ما كتبت ! تافه لدرجه اني ما اضيعش من وقتي ثانيه و اقراه تاني !!! علي سبيل مراجعه اخطائي اللغويه اللي احيانا كنوع من الاعتراف ما بحبش اصلحها !!!
كنوع من اني اضحك عليا و انا بقري كلامي بعدين !!
هو انا بعترف بالحجات ديه ليه !!!
مش عارفه !!
.
.
.
عاده بحب اصحي من النوم و ابص علي مرايه اوضتي !!
بس ما عملتش كده النهارده لاسباب غير معروفه !!
عدلت شعري بهدؤ و شلت الكابرته بفعل طفولي كده !! و اتمطعت بتمطيعه بحبهالي !!
عملت كده ليه !! ما اعرفش !!
.
.
.
قمت بغني اغنيه (fever ) باداء حركي كامل !!
والدتي كانت كلماتها محدده و موضوعيه !!
انتي صاحيه و لا لسه نايمه !! , اصلي بتكلم و انا نايمه !! بس عمري ما رقصت !!
رديت في هدؤ صاحيه و برقص !! تصدقي ده فيا !!
بصتلي في هدؤ و قالت في سرها !! بس اعتقد بصوت مسموع !! ربي عوض عليا عوض الصابرين !!

.................

كنت بمر بفتره من الاكتئاب المبرر ليا انا و بس !!
لان اي سؤال عن السبب كنت بقابله ببسمه هاديه و اقول ( هبقي زي الفل لا تقلقوا وقت و هيعدي ) !!
.
.
.
ما رنش عليا , ولا بعتلي رساله , ولا حتي بسمه بنت ناس !!!
عليه اللعنه !!
.
.
.
الاوضه مش نضيفه اوي بس فيها روح حلوه كده !!
عاده بضحك علي نفسي و اقول كده لاني عايزه اصدق كده !!!
مافيش حد بيدخل اوضتي غيري !!
اذا يبقي رايي فيها الاول و الاخير اللي يصح انك تاخده في الاعتبار !!
.
.
.


بمل بسرعه من اي حاله ايا ما كانت , و من معظم الاشخاص المسؤله عن الحالات !!
الا صحباتي و صحابي القريبين !! بحسهم ملح و سكر يومي اللي بتمني كتير يظهروا من غير ما استدعيهم , علشان اقتنع بظهورهم ده, ان الكون بيصالحني و بيبعتلي حاجه حلوه !!
.
.
.
بكره فرح صاحبتي الانتيم في ثانويه عامه !!
في العبور !!
هي منتقبه !!
لسه صحاب رغم اني بقيت مقارنه بيها منحرفه جدا جدا جدا !!
متخانقه مع بابا خناقه لطيفه فحواها ان مفيش خروج !!
فكرت هو انا عايزه اروح فعلا !! يعني اديله مساحه انه يتلاعب بمشاعري و يا يقبل يا يرفض كوني اروح !!!
فكرت طب هلبس ايه !! في المعظم فرح اسلامي !!
فكرت فكرت فكرت !!
.
.
.
الجو ساقع بس حر !!
رجلي سقعانه اوي و جسمي نفسه حران !!
نخليت عن السويت شرت و لبست لوك لوك ( بطوطي المنظر ) و قعدت علي اللاب توب !!
فكرت في جديه اني اعمللي حاجه سخنه !!!
بس كسلي منعني من اني اقف قدام البوتاجاز لخمس دقايق !!:)
.
.
.
بعد ربع ساعه من الصحيان !!! لقيت انه مش امر محفز اوي !!
قررت اني افرد جسمي تاني علي السرير و افكر قد ايه كنت صاحيه فرحانه !! و مين السبب ان الفرحه دي انزوت شويتين تلاته عن عيني كده يعني :)

ربنا يسعدك يا حبيبتي بس سوري مش هاجي الفرح و انا مش فرحانه !!!

مش قلت انك بتحبني !!!

و ساعتها فكرت جديا اني اكتبلك !!


اصل انا بتوتر بفعل المسافات القريب منها و البعيد بردو !!


تحس انه مفيش امل فيا بكل طريقه ايا ما كانت !!صعبه الارضاء كليا !!


بفسر توتري لما بتبقي علي مسافه تلامس الانفاس, بكونك تعديت محيط طاقتي فحسستني اني مكشوفه الحصون !! مفيش ابهار !! انت متطلع علي سر كل الخلطات !! طالل علي عمليه الطبخ كلها !!


و في نفس الوقت بفسر توتري لما بتبقي علي مسافه رؤيه تكثيفات الانفاس علي زجاج سياراتنا ,بكونك مش شايفني , مش عارفني , ايه خلاك متاكد ان دي درجه سخونه جسمي انا , مين قالك ان سخونه انفاسي دي شوق مش استنكار للبعد !!


عارف ايه الحل !!


تيجي تسمع معايا اغنيه تعا و لا تجي !!يمكن تفهم!!


ولا نسمع اغنيه الدنيا زي المرجيحه !!


قرب و ما تقربش , افهم و ما تفهمش , اضحك و ابقي قادر تبكي لما تلاقيني محتاجه هدؤ ما !!


هو كده انا ابقي متطلبه صح !!


مش قلت انك بتحبني !! استحمل بقي !!

؟؟....!!

كان الامر ادعي لان اخرس كل ما بعقلي من اسئله و ان اترك لمخيلتي القياده فاعدو سعيده و لو لفتره مؤقته !!
عقلي يؤنبني : اترين سعادتك بتلك الاجواء ليوم اخر !!
تعطشي للسعاده جعلني ارضي بها و ان كانت مؤقته !! و ان كانت فتات . فلم تذوفوا معني الجوع لعمر باكمله !!
 واجهته باني اراها مؤقته !! و لا اراني من ساكني هذا البورتريه لساعتين من الان و ليس لدهر كامل كما طالبني !!
كانت اسئلته ساكنه النني تؤنبني و تشعرني بوجوب الرحيل دون ان يتورط كل مننا بالاخر اكثر و اكثر !!
طفوليه قدرتي علي استكمال المشهد انبتني بكوني لست علي مستوي الموقف , كان الامر كليا مفاجيء لخيالي!!
 مكان جديد,شخص جديد,كلمات جديده,ملابس جديده,ديكورات جديده,لمسات جديده,
 حتي ردات افعال جسدي كذلك كانت جديده الي ,اليه !!!

لا زال رحيقه يسكن انفاسي ! لعله موعد استحمامي لازيح عني لقطات هذا المشهد الذي لا اقوي علي تحليل معطياته !كالعاده هروب !اتمنى كونه مؤقت

و إستكمالا للعادات , تزورني لقطه فيلمي الاقرب (before sunrise)
عندما تنطق بطلتي قائله: لما نشرف علي تعقيد كل شيء.....!!!!!!!.... و من ثم تسبح في قبله عميقه اخري , احسدها عليها !! 

يلعن ابو ده برد يا جدع

بدات توقن ان البرد قسيمها المشترك في ايامها القادمه بعمرها المديد , او الذي سيقصفه البرد بكل تاكيد من ثقل زياراته و طولها و تكرارها بكل تاكيد .

صارت حياتها القابله للاستمتاع هي فقره فاصله بين بردين و من ثم تواصل !!!

بحسها الطبي العفوي تعلم ان لحالتها النفسيه عامل كبير , قله تغذيتها كذلك عليها عامل كبير , لكن فلترحموها من مديح جبنها فهي تخاف المغص من اخر عمليه للزايده مرت بها , صار شبح مغص تلك الفتره هو المغص الاكبر و خوفها الاكبر كذلك !!

عشقها للكافيين صار دربا من المجون بتلك الحاله , صار الترجيح الاكبر لكل ما هو اصفر او يقترب من الاصفر اخضراره , ينسون , نعناع. كمون , حلبه , لدرجه انها خافت المرحله اللي جايه والدتها تغليلها جرجير او برسيم !!!
كما ان علاقتها الاسريه تعدو متفتته تماما فهي لا تجتمع بهم حتي لا تؤذيهم بردا او ياذيها والدها دخانا فهو اب مدخن ( بس زي العسل يعني ) .

صار هنالك سبب حقييقي حتي لا تجيب علي الهاتف فهو يؤلم حنجرتها حديثا, خاصه لان كلماتها قد طمس البرد ابعادها فصارت لا مفهومه و مطالبه بتكرارها مرارا و تكرارا !! لا محتمل

صار لقبها بالمنزل ( الست الحاجه البردانه او الكلفوته) فهي ترتدي بيجامتها الانثاويه بعد كم لا يهمل من طبقات الاقطان و من ثم تزيد عليهم (بروب دي شامبر) كان لجدها قديما ولا زال يحمل رحيقه , هنا يكمن السر!!, قد يكون لا مؤثر كثيرا في شعورها بدفء جسدي مضاعف و لكنه يكفل لها حضن ابوي تفتقده اثناء البرد خوفا من ان تعدي اقرب المقربين !! فهي تحيا تلك الحاله وحيده !!

اليوم اثناء مشاهدتها للتلفاز بعينان نصف ناعستان او عينان مفتوحتان بين غفوتان ,بحجره اخيها, اذ به يدنو لها و يسالها عن بردها فتجيب بحركه مرهقه لراسها عوضا عن ارهاقها لحنجرتها بما يفيد بكونها علي خير ما يرام ( الحمد لله يعني ).

فاجاها تلك المره و ربت علي راسها و قبلها و تسلل الي يديها الباردتين و ضمهما و طبع عليهما قبله حانيه !! و اسرد الف سلامه عليكي يا حبيبتي !!

في فتره البرد الاخيره صار من الصعب فهم ايهم يحدث بالواقع و ايهم حلما , فقد زادت ساعات النوم دون تدخل منها ,و زادت نسبه الاحلام بكل تاكيد و بلا ادني تدخل منها ايضا ,فهي تعتقد ان حينما تتوقف عجله الحياه الاساسيه يزداد ارهاق عقلها لصنع عالما خياليا يوازي الواقع اليومي ارهاقا و ثقلا بالاحداث, فهي لا تستطيع ان تتمتع علي هامش الحدث, اعتادت ان تضحي علي الصفوف الاولي.

في لقاء سريع بالصاله باليوم التالي سالته !! , حبيبي هو انت بوست ايدي امبارح و لا انا كنت بحلم !!

لا انا بوستك فعلا لانك قلتيلي ما تبوسنيش هتتعدي و انا ببوس راسك !!

نقطه رجوع !! انا قلتله ما تبوسنيش هتتعدي !! كنت فين في اللقطه دي !! مش فاكره اني قلت كده !!

انا قلت كده انا !!

اه و الله !!

تمنت في تلك الثانيه انها سعاد حسني في فيلم اين عقلي حيث يلاعبها زوجها محمود يس العاب مغرضه ليكسبها قله ثقه بعقلها !!

تنظر الي اخاها بهدؤ, لا ده مش محمود يس !! ولا انا سعاد حسني !!

يبقي الشيء الوحيد القابل لالقاء اللعنات عليه في تلك الثانيه حتي تبقي المريضه المسالمه !!هو البرد!! ,فهي تحب اخاها جدا و هكذا محمود يس و سعاد حسني !!!

يلعن ابو ده برد يا جدع!!!!

امين !!

 

بتدور في دائره واحده !!

 من البشر , العلاقات , اشباه العلاقات , مواقف إيمانيه , إلحاديه , أساله وجوديه بحته !!

تحلم بان تكون إبره طرحتها بقوه ثقب تلك الدائره و من ثم الولوج الي عالم اخر, مع بقيه متسربه مثلي تبقيني رغم كل و اي شيء انا !!!

حتي اعرفني لا اكثر ولا اقل !!

فهناك, حيث احلم ان انتمي , تتشابه الوجوه كثيرا !!

فهي ناعمه كاطفال حديثي الولاده , بشوشه كصانعي النكات, دافيه كام وضعت رضيعها الاول من ثواني قليله , بهيجه الالوان و الملابس كقطع المارشميلو ذات الصناعه المصريه ( درب من دروب الخيال ) !!

تحفزي لان اتمتع بتلك الصفات علي الاقل و من ثم ازيد عليها بلغبطه الانا عندي , تجعلني بلا ادني تردد ارفع يداي للسماء و اطلبها برفق!!

 ربي اراني هناك اسعد و اقل اصابه بالبرد!!

 فلتدخلني في دوامه مداها هذا الكوكب الاخر , حيث لا خرم للاوزون قد يبعث لنا باي تفاهات من الكون الخارجي!!

و بهذا لن اصاب بالبرد يوما فقد اغلقوا خرم الاوزون السخيف الذي يبعث للعالم اجمع بكل ما هو زايد عن دفء جسده!!

امين!!

تواصل !!

كان الجو اميل لكونه يحمل لقب بارد , بارد لكونه يتحلي بالبرد و البرود سويا !! , لكن شوربه السي فود جعلت من جسدي مدفأه متحركه , كانت يداي يشعان بهدؤ دافيء يستشعره ساكني مجلسي ,لنقول دفء يتسع لثلاثه اقدام بعدا عن هالتي !!
فقد تلقي ذبذباته بالكاد و غافلته عيناه بنظره موحيه بشي ما نحوي, شيء طيب عكس ما هو متوقع !!

كان خلافنا الاخير علي اللا شيء و توصلنا به للا شيء نفسه , مجرد غضب من اشياء تسكن اللا شيء العظيم بينما كل ما نملكه ......... لا شيء !!

لكن ما ألمني اكثر من الخلاف كوننا اختلفنا اصلا !!!

 كيف طاوعته عيناه ان يراني بكل هذا الحزن ساكن الوسائد بكل ليله ادرت بها ظهري له مستمتعه كعادتي بلحن انفاسه ليساعدني علي نوم ادعو من الله ان يخلو من طيفه يعنفني !!, فانا كانثي طفوليه الغضب احمل غضبي الي احلامي بكل لا مبرر مني !!

كيف تجاوز الليله و ليله بعدها و لم يقرر ان يبدا حديثا غض ما قد يستميلني به !!

كيف انهزم هكذا امام اللا شيء !! , تربيتي التي تعلن ان الرجل ( رجــــل ) جعلتني بلا قصد احمله العبء الاكبر !!!


لا اعلم ما اجاباته علي تلك الاسئله, و بنفس التوقيت لا احترم موقفه الصامت هذا , و هنا تكمن المشكله, لاني بذلك لا التمس له اي اعذار , و هنا تكمن مشكله اكبر ان التراكم الزمني يقسي من قلبي و يجعل فكره الهروب الكليه من هذا الحزن ملجيء وحيد !! 


 تحضرت لان اخبره علي العشاء باني انوي السفر ليومان بمكان ما وحدي , لاشرف علي تهدئته و تهدئتي ببعدي هذا !! و لكن لم ياتي موعد العشاء بعد , اذا ساعات اخري من الشقاء النفسي


اخبرته باول يوم لنا علي كوكبنا الجديد باني كارهه لمبدا الصوت العالي , الاختلاف في حد ذاته ليس له مكان بينما اتفقنا علي التوسط في كل ما اختلفنا به !!اعتقد باني كنت اهزي بعالم لا حقيقي علي الاطلاق !!
.
.
.لملمت اطباق السفره بحركه سريعه و التفاته هادئه لاتاكد من كونه قد اشعل ثقاب البدء بسيجاره ما بعد الغداء !, تهاونت في ترتيب الاطباق علي يدي ترتيبا مقنعا و تحملت اكبر عدد يؤهلني لاقل ذهاب و اياب الي السفره !! 
 لم ارد ان يزيد من حنقي دخان سجائره المؤذي لجيوبي الانفيه , في كل ذهاب و اياب من و الي المطبخ لانظف ما بعثرناه علي الغداء !!

تعثرت في طريقي للمطبخ بسجاده الطرقه فسقطت مني زفره سخط طويله و تافف واضح علي صوتي دون ترتيب مني في رساله طويله للعالم مبداها 

                                       اووووووووووووووف

لم يسقط مني اي شيء و لكن زارتني لفتته ليطمئن علي سير الوضع اثناء تبديله لمحطه التلفاز علي ماتش كروي سخيف ما يعلي من توتر الاجواء !!

اعدت له كوب الشاي بينما ركبت كم من الاعشاب لي , تعود ان يضع السكر بكوبي و لكن تلك المره سابقته و وضعته في كوبينا , لم اقلبه و سحبت مهديء اعصابي الي الشرفه لاستمتع بهواء نقي ..
.
.

بنظره محدده اخبرته انه يجلس علي شال كتفاي , قام من مجلسه و خلفه لي في هدؤ و بنظره الي اطراف قدماي المنكمشه , اسرد بهدؤ ( فلترتدي شرابا ما فقدماك كارهي السيراميك يبدوان اقل احمرارا و اميل الي الزرقه !!)

نظرت الي قدماي المنكمشتان و دلفت الي حجرتنا وارتديت لكلوكا اهداه لي في وقت لاحق رسم عليه دبدوب مرح يغمز بعينا و الاخري يراقب بها الموقف , سلبته من جانب اقرنائه فانا املك اكثر من لكلوك لمدي بروده اطرافي شتائا و جميعها تقريبا يحملون ختم هداياه .

سقت قدماي المثقله و جسدي المتهاوي الي الشرفه و بجلسه طفوليه احتويت نفسي بنفسي و لم احتاج سوي لشالي الوردي احيط به قدماي الائي لا زالا يرتجفان بردا!!
.
.
.
كان كتابي يفيض بتفاصيل كثيره و مركبه و بذلك استطاع ان يختطفني من الاجواء الي اجواء اخري , استسلمت لسرده و لم يفقني سوي الم انفي و اعلانها عن بدايه صداع ما , اما من وضعيه النظاره علي جيوبي الانفيه و اما من وضعيه الدخان في رئتاي مرورا علي جيوبي الانفيه ايضا !!

لا اعلم و لكن بامر صارخ مني اغمضت عيناي و نزعت نظارتي و رفعت يداي لاتمطع و ازيح عني فكره الصداع !!

انغمس كفاي بسحابات افكاري مصاحبه ذرات الهواء المحيط
لاعلي
       لاعلي
               لاعلي .... جسد ما يلمسني , فزعت في باديء الامر, فاذ به هو !! 

كان قد تسمر في مكانه منذ دقائق يراقنبي اقرا و قد تخلي عن شرابه كذلك متناسيا بروده الارض , رددت ببسمه هادئه و اسردت ( مش بردان !!)

اه بردان
 

تعالي جنبي طيب بدل ما قاعد بتتفرج من بعيد

هترضي عني و تقريلي اللي بتقريه!!

مش هتحبها دي رومانسيه و انت مودك اكشن !! هو الماتش خلص صحيح !! ولا دلوقتي الاستراحه بين الشوطين

لا الاهلي شغال الله ينور بس عادي لو دخلوا جون هعرف من صوت الجيران!!
يضايقك لو قعدت معاكي!!

اذا لقد تخلي عن الماتش ليدنو مني فقط !! بونت لصالحك يا سيدي ابسط !! (عزمتك سابق يبقي مفيش مضايقه , بس اقعد ساكت علشان اركز !!)

الصداع عامل ايه !!

عرفت منين اني مصدعه؟

اصلك قلعتي النظاره و بعديها اتمتعطي !!و عاقده حواجبك و انتي بتتكلمي !!


ببسمه رضا علي ترجمته للغتي الصامته طلبت منه مسكن ما من حقيبتي و ان يحضر لي كوب من الماء اللا بارد .

كمان بونت في مصلحتك , ابسط يا عم شكلي هرضي عنك و هلطف الجو !!

سالني عن رايي بكوب من البيبسي بدلا من الماء ,فنظرت له بصمت و هزه من راسي بالنفي!!! , فهو يعلم اني لا اكره بحياتي اكثر من البيبسي و مؤخرا كل المياه الغازيه رغبه مني في تقليل وزني , لاحبني اكثر و بهذا يحبني هو اكثر !!
.
.


ممكن كل بونتاته تروح في اللقطه دي بس انا هستجدع !!!

ذهب و تركني وحدي بالشرفه, نفضت عني كسل الجلوس و اسندت عضلات بطني علي الشرفه و رفعت يداي الي اعلي بتمطيعه اقوي و تحريك لخصلات شعري لتضحي اكثر غجريه !. لم افق من حاله متابعتي لسكون و حركه الطريق الا بلمسه هادئه تضع الشال علي كتفاي و تحدثني بجانب اذناي ( كده احسن بدل ما تبردي !!)!!

التفت بجسدي نحوه و احطت راسه بيداي الدافئتان و اسردت :

هذا يعد دربا رائعا لتخفيف وتيره الغضب فيما بيننا , شاطر

انا عرفت اختار اللي اتجوزه !

و ده لاني شطوره بردو, انسي اني اقولك لانك زوج رائع

كده ولا ايه :)

و كعادته اجابني ايه طبـــــــــــــــــــــعا


ترجمتي للموقف زادات من الصداع لكونه رغم نجاحه في ترجمتي بصوره صحيحه اولا الا انه غافل تلك التفصيله البسيطه بي كوني اكره المياه الغازيه , اغمضت عيني بشده للمره الاخيره و قررت ان لا اتحول من نابع غضبي الي امراه مصريه معتاده تنظر الي العيوب فقط و قررت ان اسعد لكونه ترجمني اولا بصوره صحيحه !!   

خير خير خير !!!

صحيت من النوم حاسه !!
ب..........
ب..............
ب..................
بولا شيء , فعليا ولا شيء و ده اغرب ما في الامر !!
كان حلم حلو , مش فاكره منه ولا تفصيله , بس حضنه كان دافي اوي !!!
هو امتي وشه هيبقي ليه ملامح مرضيه , اقصد مرضيه لكونها لسكان الارض, لاني بتديت اقتنع انه اكيد كائن خزعبلي مش قابل للقاء كافيهاتي انساني العادي, اصل انا كائن محب للكافيهات  !!
النظريه اني حابه اصدق اني ممكن اقابله , بدل ما انا بتعلق يوميا بكائن خيالي كليا كده !!

خير خير خير

فضلت نايمه في السرير فعليا مع بسمه للسقف , مش لسبب انا بس حابه ابتسم !!
فكرت اني اكمل نوم و اغير وضعيه جسمي و بس !!
رميت ودني علي الصاله , هديت وتيره تنفسي و بخفه صمت , حاولت اعرف مين في البيت و اتمنيت بصوت هادي و صلوات صامته  يكون اقل عدد محتمل !!
حابه اعيش حالتي لوحدي من غير اي تدخل قد يفسدها , و قد يجعلها اكثر عبقريه !! لا اعلم و لكني لست في مجال للمراهنه!!,
المفاجاه اني راضيه بالحاله دي زي ما هي كده !!

 انا... راضيه !!

اكيد القيامه قربت يا حبي !!.....................
 انا دايما بكلمني كده و بقوللي يا حبي :), ممم احتمال نوع من النرجسيه , بس الحقيقه اني بحب ادلعني !!

خير خير خير

كماله لقانون الدلع !! , قمت من علي السرير و بصيت لمرايه اوضتي و ابتسمت , رتبت شعري بهدؤ , اصلي مش عيزاه منمق !! انا بس عيزاه قابل للانتقاض !!
خرجت من الاوده بهمس يا رب يكون الكل نايم !! , اه نسيت اقول اني ما بصتش في ساعه الموبايل ! , انا بس شفت كام حد هعتذرله اني كنت نايمه و ما ردتش علي تليفونه !! ولا ساعه الحيطه بالتاكيد لان النور كان ظلمه !!
( حلوه النور كان ظلمه دي !!! )
 ما علينا :) !

خير خير خير

ماما لوحدها في اوضه , اخويا في الاوضه التانيه , بابا مش هنا !!
مش اللي كنت متوقعاه بس اوكي !!!

خير خير خير

دخلت اتشاقي علي ماما و ابوسها عنوه !!
هي بتكره ده !!
, او دايما بتحب تبين ده !!
 بس بفضل اقنعني انها بتحبه !! وجهات نظر !!
ابتسمت لكوبايه الميه اللي بتغلي علي البوتاجاز, بلمحه هاديه مني و انا في الحمام  بغسل وشي بغسول جديد بريحه اللمون ! جبتهولي كماله للدلع بردو , قلت لنفسي بهدؤ , هو ده وقت القرايه ولا حاجه !!
 خير
     خير
         خير :)

ا ط ل ق !!!

سالني في رساله خفيه !! ,علي انبوكسي الفيس بوكي, اللي بحسه معادي مع القدر دايما !!

انا من كارهي الشات , و مع ذلك بلاقيني كتير علي شات انبوكسي من غير ميعاد و بلا وقت محسوب مداه !!

مش لاني فاضيه ولا لان اللي قدامي فاضي , بس اعتقد حلاوته بيبقي  في كونه مقنن بميعاد قليل بالمنطق , بيمتد دايما من غير لا قصدي ولا قصده و لا قصدهم !!
متعه الخفاء يعني و التخفي من القوانين المقترحه !!!

كان قلقان عليا و في صوته اللي مش مسموع غير ليا نبره عتاب اني سايبه نفسي كده !!

                                    كده!!!

 دي اللي هي مش اطلقت اللحيه من الاكتئاب ولا قررت انعزل الكون !! , بس ممكن تقول منزويه شويه بس و بحاول اطمن نفسي لاني حاسه الكوكب واسع عليا اوي و اني بكل بساطه بردانه شويه , شويتين , تلاته يعني !!

للتبسيط !!!!

اللي هو احساس البلوزه الواسعه عليك اللي بتسرب لجسمك هوا من كل انحنائه غصب ليها بفعل الجاذبيه الارضيه و كهربه جسمك اللي المفروض انها متنيله علي عينها ساكنه !!! , اهو انا بحس بالبرد ده مش برغبه مني لكن بفعل قوانين بتتمارس عليا زي قانون الجاذبيه اللي ملناش يد فيه ده , و سكون الكهربا اللي بتكهرب بردو !!

اصل انا ما قلتلكش اني بكره قانون الجاذبيه و ما شابهه , اهوه اديني قلت :)

اعتقد اني عقدتها بس لا زالت واضحه !! اعتقد !!

حاولت اطمنه و اطمن معاه نفسي !! كلمته بنبره صوت اسمعها و هيسمعني بيها اكيد!!!
جبت منين التاكيد !!
 انا دايما لعبتها صح و ما ردتش علي حد من اللي بيحاولوا يتصلوا بيا في حاله زي دي , و سمعته صوتي و انا في الحاله دي , علشان ما اخليش لحد مرجعيه لصوتي و انا تايهه فمتتخزنش في مخه صورتي دي  !!

شفت كميه دي !!
كانها حد غيري مثلا !!
دي!!

                                شفت انا مكلكعه ازاي !!!

هنزل لوحدي الصبح اتمشي , مش مقرره اي حاجه ولا اي اتجاه!!
 اينعم انا متفقه انا و صاحبتي نتقابل كل يوم سبت الصبح في كافيه دافي مع كوبايه كراميل مكاتو عبقريه, يحلي معاها دفا الحنجره و تبتدي كلماتنا عن خوفنا و اطمئنانا تتهاوي علينا من اللا مكان !! بس لسبب مش معروف انا حاسه انها هتروح عليها نومه بكره !! و مقرره بردو اني مش هزعل منها و لا هعاتبها , انا بكره الكون لما يعاتبني علي موقف غير مبرر اخدته !! مش هبقي بخيله عليها بحق اديته لنفسي !!!

طولت عليك !!

عامه !!

انا قررت اني هلبس كوتشي مريح اوي في رجلي و هنسي اصول الشياكه و اتيكيت الاماكن و الصحبه , قررت كمان اني هروح من بيتنا لمدينه نصر مشي !! , موقفني اني مش حافظه الطريق مشي يبقي ازاي !! و لو سالت حد هيضحك عليا !!

انا حتي قررت انزل اجيب بطاريه للام بي فور بتاعي و هحط عليه اغاني جديده كلها عليا و اسمعها طول الطريق . ان مكنش في طريقي من بيتنا  لمدينه نصر هيبقي من مدينه نصر لبيتنا !!!!

من الاخر قررت اطلق ساقي للريح و اطلق علي عقلي الرصاص و اطلق المضايقه بالتلاته !!!! :)

اهو كله................. ا ط ل ق :)

انا عماله اجبها كده و كده بس بحاول الاقي صيغه تريحني

شفت بقي اني شطوره !!!
:)

..