الخميس، 30 يونيو، 2011

يا رب الاهلي يكسب !!!!




كانت البدايه في محاوله مرحه مني لإنهاء يوم يتصف بكل وضوح و صراحه و سماجه بكونه يوم محتاج جردل ميه ساقعه يتبلع بيها  و يتزلط كدهوووه علي سهوه...

 الماتش هيشتغل,
لا لا هيتلغي ,
لا هيشتغل,
إنتي فاشله علي فكره,
 الله لا يسامحك يا بعيد........

إنتهيت من يومي العملي القميء و قررت ان أتحرر من سطوه الغضب و ان أذهب للقاء أقرب المقربات لي بإحدي سلينتروهات العصر حيث أول يوم قبض بقي و الواحد لااااازم ينبسط.

بعد ان تفكرت بمدي المكاسب الخياليه في كوننا سنلتقي في نفس موعد الماتش .. إذااااا  عد معايا يا عمونااااااا..
1-           الكافيه فاضي ,أي قليل من العيون المترقبه لصوت ضحكاتنا العاليه المتتاليه الإشمئناطيه( تعبير علي الماشي ليس اكتر او اقل ) .
2-           لا  يمكن أن نتناسي و ننكر فضل كوننا لا كرويين بالمره, حيث اللا ضغط و اللا سكرو يلعن أبو هز الرجلين ,وإننا لو فكرنا نشتري أي حاجه من أي حته هنشتريها من غير ما نسمع الجمل السخيفه المحفزه المتوقعه.. إتفضلي يا أنسه, يا خبر هياكل منك حته, لا حتتين , طب تعالي بصي بس, خد فكره و أتنيل علي عينك و أشتري بكره !!علي أساس إن بكره أخر الشهر و هنقبض يعني !!!
3-           إن أبويا و أبوها كرويين أهلوييييييييييينمتعصبين ( رجاله زي الفل من الأخر يعني ) لن يلتفتوا إلي مدي تأخرنا بالخارج بفضل الماتش المنتظر!!!
 .............................

بعد يوم عبقري متليءليء إلا إنني مع إيقاف أول تاكسي يخطف مني بسمتي الأخري إلي منزلها حتي رجعت إلي صديقي الصدوق لفلفوني بأنغامه المرحه.
كنت أشعر بالمرح لشيء ما لا أعرفه حق المعرفه ,و لكنه يشعر بي علي كل حال و يواظب علي كونه يحرصني بدون سبب ,أو بسبب أيا ما كان مقنع له و ليس لي فلا زلت لا اعرفه!!!!. ربنا يباركلك يا أخويا و أشوفك ضااااااااابط!!:)

كنت أحمل الكثير من الحقائب منعتني في البدايه من ممارسه رياضتي المفضله .المشي في الشارع و انا بسمع ميوزيك ,و الأهم  من ده كله إني أمشي مشيه البنت المتسربعه من غير ما أفكر إن عيني تخونني و تهوب ناحيه الشمال فوق في موبايلي و أبص في ساعه و انا بغير من أغنيه لأغنيه!
أخدت القرار و نفذته ,مشيت,مشيت,كتيييييييييير دون أدني شعور بالتعب إلا بكتفاي من فعل الحقيبه, الحقيبتاااااااان....
تاااااااكس.... أقرب مكان للقصر الجمهوري لو سمحت! كنت أفتقد نافوره القصر الجمهوري كثيرا و هكذا أفتقد بائع البوكور( الفوشااااااار ) اللطيف جدا ذو الإبتسامه المتبسمه( إتفضلي يا بنتي! ) يا لهوي , ببقي نفسي أبوسه و أقوله انا بنتك  و بتبتسملي كده !!!هيييييييييييه :) بس انا بنت عاقله و أعجبكم يعني, و انا اصلا بعمل ريجيم و مش ناقصه غلب بقي و شعور بالذنب . لم التقي به فعلي ما يبدو أن أبي الروحي ( الجاد فاذر) أهلاوي زي أبويا الحقيقي ( الريييل فاذر ).

وصلت , و بعد إستراحه لطيفه لكتفاي قررت الإستمرار حتي منزلي بمشيه البنت المتسربعه بس مش أوي يعني اصلي قربت!..
 محل المونيكير المفضل لدي لألوانه المبهجه المرحه اللائي تشبهنني حين أحبني !مفتوح!!!!!!!!

مع أول إطلاله علي الوانه الجديده لم أشعر برضا كبير سوي عن هذا !! نعم هذا!!!!!! انه لون جديد يا تريي يا هلتري سيناسبني؟ كانت يداي مكبله بلون بنفسيجي قاتم و لكنه محبب الي كثيرا و لكن بكل اسف لن يسمح لضيفي بالظهور, و لكني قررت بعد ان سالت عن الثمن و رضاني ان اشتريه علي سبيل التجربه ...
 حلمك لو يوم يلمسها تديك اكترما بتحلم , الفرصه بتعرف ناسها و اللي بتفوته بيندم, و العاقل لو يلحقها يتبدل بيه الحال .. الاغنيه اللي كانت شغاله في ودني ساعتها .. تفتكروا علامه ؟؟

ذهبت للكاشير المتابع الجيد جدا جدا جداااااااا للماتش, العجوز, ذو الظهر المنحني ,و القميص المخطط داائما, و بعد ثواني كثيره و انا في وضع التصلب أمامه ,حتي شعر بكائن سلبندا جنبه اخيرااااااااا.
·     تبسمت و قلت له و لا يهمك بس هو بقي كام كام الماتش ؟
·     اتنين صفر هيغلبونا و لاد ال... تييييييييييييت ( حذفت لإمكنيه متابعه ناس محترمه ,مش عارفه إزاي بس اهوه بقي يبقي عملنا اللي علينا بردو.. استحمااال ) سوري بس الواحد دمه محروق :)
·     ولا يهمك اتفضل تمن الاكلادور.
·     استني استنييييي ,يلا يلا يلااااااا جون بقي جوون جوووون , و ديني و ما اعبد لو دخل جون لمديكي المانيكير ببلاش كاديه( اللي هو كادوه , ما تحرجهوش بقي ... الله!).
·     تسلملي ياااااااااااااا رب الاهلي يكسب يا رب يا سيدي!!!!
·     اوووف ما دخلش بس عارفه انا ارتحتلك و حاسس اننا هنكسب لجل وشك السمح ده, بصي خدي المانيكير هديه مني ليكي بس أمانه أدعي للأهلي يكسب ألا الست هتشمت فيا؟
·     أنهي ست مراتك يعني !تشمت ليه بس؟
·     اصلها زملكاويه, أمال انا فاتح المحل الساعه دي ليه يعني ؟ هربان من وش أمها العكر, الزملكاويه المعفنه ,مش عارف إتجوزت واحده زملكاويه ليه انا ؟
·     انت اتجوزتها و هي زملكاويه ولا ظهر عليها الأعراض بعد الجواز........... ؟
·      و النبي ما أفتكر, الموضوع أصله بقاله كتير يلا الله يسامحها امي بقي ؟

الغريبه انه فقد التركيز في الماتش و قعد يكلمني و ياااخد و يدييي و ياااخد و يدي ...
·     مستعجله شكلك ؟
·     اكيد الوقت متأخر اصله!!
·     طب ما تنسيش تدعي.
·     هدعيلك من عيني بس بردو هتاخد الفلوس.
·     تحرم عليا حرمانيه الدم و ألا تكون مراتي اللي في البيت طالق مني!!!
·     يا عم إنت بتتلكك إيه د ه فيه كده بردو .. و لكني لم استطح كبح ضحكاتي تلك المره و انفجرت في الضحك !!!!
·     ربنا يضحكلك الدنيا كلها يا رب في عينك!!
·     ياااااااااااااااااااااااه الله يباركلك يا رب :)
........
ذهبت للمنزل و انا كللي طاقه إيجابيه أن أمحو مانيكيري بأسرع وقت ممكن و أحل محله كادوهي العزيز. و لكن ظل يؤرقني شيء واحد , أن يكسب الأهلي المباراه حتي لا يلعني في السما و الأرض أخينا البياع اللي بيتلكك يطلق مراته مع أي حد يدخل المحل يقوله سالخير و يمشي .....
يااااااااااااااا رب الأهلي يكسب بقي حفاظا علي ماء الوجه يعنيييي,بس و الله صعب عليا الراجل ده, ربنا يهديله مراته و تسلم و تبقي أهلاويه  زيه بقي بقي :)



ليست هناك تعليقات: