الأحد، 1 يوليو، 2012

يحكي أن !


يحكي ان في قديم الزمان و العصر و الاوان , فتاه حلوه و بتحب تصرف موت حصلها مشكله في الشغل بتاعها !, قررت تسيبه النهارده قبل بكره !, دورت و الغريبه انها لقت بسرعه فعلا !, لانهم كانوا مش قادرين علي بعدها نظريا و مخنوقين منها عمليا لانها خلت بيهم !,قرروا اصحاب الشغل الاشرار ما يدوش ست الحسن و الاموال مرتبها !, عاشت عيشه صعبه لشهر و ربع , ادمنت السلف و التلف و الرد  اللي هو دايما بخساره !
بعد وقت كتير حبت تفتكر ايامها دي بحاجه علي الماشي كدهوه و تضحك عليها علي الماشي كدهوه بردو :

من الدروس المستفاده من كوني ما قبضتش لغايه دلوقتي قبض شهر تلاته!!!

1- اني اول مره اجرب شعور السلف !! ,هو سيء لو بتقابل اللي مستلف منهم و بتقعد معاهم, لان بيصعب عليك تطلب طلبات قدامهم , و تحس ان لسان حالهم بيقول (بفنوسي يا كلااب ) :(


2- اني لغايه دلوقتي صارفه في الشهر بحاله حوالييييييي 400 او 500 جنيه !!, وده كويس لاني ممكن احوش بقيه القبض!!, لما اقبض يعني !! . حتي لو قلت 200 جنيه فرفشه مع اني عارفه ان الفلوس بتاكل صوابعي ولا القراده و هصرف اكتر ,بس بردو هيبقي اسمي حوشت يعني ... 

بصبر روحي :(

3- اني ملمومه عن الناس اللي اعرفهم  لاني مش عارفه اقابلهم كتير علشان القرشينات , وممكن اقولها بطريقه تانيه اشيك و كده ,قال يعني بتقل عليهم و التقل صنعه !!

 بصبر روحي بردو !!

4- ان ماما لاول مره متعاطفه معايا في كوني بصرف فلوس, كل شهر عاده ما بنجحش اكفي المرتب بالشهر !, دايما الشهر اطول من المرتب كتر او قل ! العيب فيا مش في الشهر الحقيقه ! , بس الغريبه اني لما استلفت كعاده كل اخر شهر ما قعدتش تمقتني اوي يعني :)




.....................
و تلخيصا للوضع علشان ما ارغيش كتير في المطلق المتطلق بالتلاته! ...
اني اكتشفت في روحي قدرات كتير ما اعرفهاش , حاجات منها مفيده و حاجات عاديه:
  • اغنيتي المفضله بقت شيال الحمول يا صغنن !
  • و لما الحياه تبوظ اوي و تبقي معدي قدام محل فيه بلوزه هتموت عليها , بتبقي اغنيتك المفضله ( و الله يا زمن ما بادينا زرعنا الشوك ) ,:(  
  • شر البليه ما يضحك ده حقيقي جدا!, مرحله رثاء الذات دي قصيره اوي و بقي الاقرب اني اضحك علي كل و اي موقف بعدي عليه !,لدرجه اني بستغربني!
  •  بس الاظرف و الاحلي عامه من وجهه نظري ان قدرتي علي الحسبنه زادت و بقيت بحسبن بسرعه تلت دعاوي و ابتهالين في الدقيقه علي بتوع الشغل اللي فات ..... 

إلهي يجيهم و يحط عليهم !!
(يجيهم ايه ما اعرفش! 
و يحط عليهم بايه !ما تسالنيش و انا مالي !
بس هم بيقولوا كده, 
و هم مين ما اعرفش بردو! )
 بس يتحط عليهم صح يعني يا رب  !
ما هو ما يبقاش لا مرتب ولا حطه تريح قلبي !!

إمضاء سميحه المنيحه المليحه المستكينصه بالوضع و السلام :)

هناك 7 تعليقات:

Radwa Ashraf يقول...

ههههههههه ربنا ما ينججهم أه والله!
كل ده متقبضيش ليه؟
أنا عارفة احساس الافلاس .. بجربه كتير جدا! :)

ربنا معاكى بقى :)

Menna يقول...

فكرتيني برضه لما سيبت شغلي القديم
كانت شركة المانية سيبتها و روحت حكومة العجيبة الاول الفلوس مش كانت بتكفي حاجة
الحمد لله دلوقتي بجيب كل حاجة و الفلوس بتكفي و بحوش بالرغم اني مش بقبض زيادة عن الاول
تقريبا زمان كانوا بيبصولي في الشغل اني في شركة اجنبية بقى وبتاع و متخيلين بقبض باليورو و دلوقتي محدش بيفكر يبصلي لاني بقيت موظفة الحكومة الغلبانة
لو عرفتي تحلي مشكلة الصرف دي فعلا ابقى قوليلي لاني مش عرفت احلها خالص

khaled nagy يقول...

ههههههههههههههه

حلوه دى...الشغل القديم ..تهذيب واصلاح

بس الاظرف و الاحلي عامه من وجهه نظري ان قدرتي علي الحسبنه زادت و بقيت بحسبن بسرعه تلت دعاوي و ابتهالين في الدقيقه علي بتوع الشغل اللي فات ....


حلوه وخفيفه ..ضحكتنى ..وفكرتنى بايام مضيت..واضح ان كلنا لازم نعدى ع اكلى حقوق الغلابه دول

arafa farouk يقول...

ههههه

ممكن تضيفى لمواهبك قدرةعلى التنكيت فى عز البلاء

مصرية بجد
هههه

نشات يقول...

مش تقولى انك مزنوقة كدة .. كنت اسلفك من جتيه لعشرة مش خسارة فيكى

تامروردة يقول...

معقولة كل ده حصل معاكي.
واحنا مانعرفش.
تؤ تؤ تؤ تؤ تؤ تؤ تؤ

كل ده عشان ماسمعتيش كلام بابا.
قالك ممكن يجيبلك حقك بإذن الله :)

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول
غلا الروح
شات غلا الروح
شات صوتي
شات مغربي