الثلاثاء، 3 أبريل 2012

فارس احلامي !!!


فارس الاحلام :)
استطيع ان اصف و بكل اختصار مني, اي ابتسامه مرحه مستهتره تحتل شفاهكم الان!
اعلم انه لمسمي بوهيمي !
 شخصيه غير قابله لسكني اي زمان و اي مكان و اي ظروف اجتماعيه او سياسيه او حتي فضائيه !

ايه رايكم اسرد حبا في السرد ! و بالمره نبحبها شويه !!


احم احم ..
 من و انا صغيره و كان سؤال اي بنت ليا في مدرستي ايه مواصفات فتي احلامك؟,سيبك اني كنت بنت دحاحه !, و اعتقد ده اللي كان بيشدهم انهم يسالوني لاني كبنت دحيحه! , اكيد بقي ما بفكرش في الحاجت دهين !!
هم كانوا فاكرين فيا كده !! و مش عارفه ليه !!
 ما تقولوش هري بنات !, بس بجد في بنات كتير بتعيش علي الحلم ده و الغريبه انه بيبقي حلمها الوحيد في الكوكب! , ان حظها يبقي حلو و تلاقيه !
 غريبه ! ,هو انا ليه مش كده !.
 اكيد كان ليا مواصفات كتير اوي تحده , بس عمري ما شفت لوشه ملامح و لا لجسمه ابعاد !
يعني احتماليه انه يكون طويل , قصير , تخين , رفيع , اسمر , ابيض , بنظاره , عامل عمليه ليزك :), كلها متاحه جدا بل مستحبه كمان .

مع تطور دماغي و شخصيي , اتطور معايا حلمي بهذا الرجل الخيالي , لدرجه اني بقيت افكر جديا!
هو انت هناك , هناك فين ؟ 
طب انت هتيجي امتي ؟ و لما هتيجي انا هعرف ازاي ان ده انت ؟
 مش ممكن ساعتها يبقي نظري اضعف من اني اشوفك ؟
 او يبقي ده انتقام ربنا مني, من دعاوي ماما عليا ( علشان ما نضفتش معاها الشقه كلها في العيد مثلا!!, لان احنا شباب السمن الصناعي صحتنا علي قدنا و نصعب علي الكافر!! ), و يبقي عقاب ربنا ليا اني ما اشوفكش لم تبقي قابل للرؤيا !!

فكرت  كتير و قليل و ابتديت اعصر زناد(زنـــــــــــــات) فكري , علشان لما حد يسالني عنه او عن مواصفاته اكرهمله ..
واحد كذا, اتنين كذا , تلاته كذا كذا !!.......
 ........
زمان و انا صغيره بردو!!, بعد كم احراجات بنت حلال من كل سؤال عن الحج فتي احلامي!, اللي ما بعرفش اقول فيه كلمه غير انه هيملي عيني !!
 قررت انه كفايه احراج ولازم اقول انا عايزه ايه في ام الرجل ده !!!!!!!!!!! 


هو اكيد رجل !!, يا فرج الله اهوه صفه اهيه !!..
طب ما هو لازم يبقي رجل , مش الانسه استريت بردو ولا ايه !!.
 لا اقصد رجل يعني رجل جدع كده ,و اقدر اثق فيه و اعتمد عليه و اسيبه يسوق حبه و انا عارفه انه مش هيعمل بيا حادثه !!

قعدت افكر افكر افكر في اي صفه تانيه!! 
 ابتديت زي كل البنات صحباتي اكون من اللي حواليا تكوينات تنفع تتلزق قص و لصق في حد ما في مكان ما , ينفع احبه و اعيش معاه و كده !!
مش بطريقه عينيه!!
 لاني فيا العبر اه !, بس مش سطحيه !!
يعني مش هقولك!!, عينيه عيون احمد عز !!و شفايفه كريم عبد العزيز !!ولا رموشه رموش اليسا !!.
لاني اكيد ما بحبش اليسا و كل السابق ذكرهم ,اللي متجوز و اللي مش هيتجوز و انا ما اقبلش بدره ولا هفك عقد حد انا !!
كان احمد عز قاعد هنا و هي قاعده هنا و علي نغمه واحده!!
 مخدوش يابابا ما اخدوش يا بابا !!!!!!!!!:) هو كده بالظبط  
 
بس مثلا مثلا مثلا اغنيه فارس احلامي للست شاديه ست الكل !!
تفتكر في حد اكتر !
هعوز فيه ايه تاني , الرجل عداه العيب و ازح !!
عيزاك تفهمني تفهمني تفهمني !! و تحقق صوره احلامي ...
اهي لا قالت كلمه ولا عشره !!, حشرته جوه دماغها انه يفهمها فيحقق اللي هي عيزاه من غير ما تتكلم !!
و الحج نزار عم الكل قالك فان الكلام يموت حين يقال !!

اذا
اجولها ليـــــــــــــــــــه!!! 
 
شايفين يا عيني حتي الست السكره شاديه , عارفه انه كونه يفهمها صعب ازاي , دي عادتهاله مليون مره !!

كان من اللطيف اني افتكر مواصفات فتي احلامي زمان و اقارنه بمواصفاته دلوقتي و اضحك علي روحي حبتين , تلاته , اربعه , عشره !!!!!

زمان و انا صغيره كتبت ورقه فلوسكاب للكائن المجهول دهون( فارس احلامي ) و رميتها من شباك اوضتي! , وقعت في المنورقدام عيني ! , بس اقنعت روحي انها هتطيــــــــــــــــر و تروحله و يسلملي عليه نسيم الليل المتهادي !!
كنت عبيطه !!
بس انا كنت زمان بحب الولد اللي بنظاره اوي !
و كان ممكن اتخانق مع اي حد يقوله يا ابو اربع عيون!
ست مصريه جدعه من يومي يعني:)

من قريب فكرت ليه بتشد لده و ليه ما بتشدش لده؟
 و ليه ما بين كده او كده مش مرتاحه انا علي راي عم الكل منير !!
لقيتني بحب فيه حاجه مني!! 
اغنيه بحبها , كتاب استمتعت بيه , فيلم حسيت فيه نفسي !!
مش بقول اتشدله اني اقع في دباديبه , لكن علي الاقل احس بانس ليه و بيه !!

 استني استني !! تعاليلي هنا !!! 
يعني انا بحب فيه نفسي يعني !!
 يعني انا نرجسيه في حبي ليه !!
يعني انا وحشه و شريره !!
عااااااااااااااااااااااااااااااااااااا
.............................

قطعت كلامي و اخدت نفس عميق و اردفت في عقل بالي بردو!!

يا عم الكائن الخرافي الخزعبلي المتوجس من الظهور !!
اظهر و بان عليك الامان بقي !!
و اوعدك هعملك سندوتشات حلاوه بالقشطه ,و احتمال ارضي عنك و اعملك كريم كراميل كمان  :) 
اصل علشان نبقي علي نور من اولها , انا شاطره في الحاجات المسكره, الحادق مليش فيه اوي !!
بس اتعلم يعني :)
حواااااااااااش!!
شيلني يا حوااااااااش :) 

 

هناك 7 تعليقات:

Menna يقول...

ممكن اختلف مع الاخت شادية؟
مش عاوزاه يشيلني على ايده
عاوزاه يشيلني جوه عنيه؟ ينفع ولا لا؟
على فكرة متدوريش جواكي على اجابة السؤال ولو البنات الغلسة اياها سالت ردي و قوللهم ملكوش دعوة وطلعيلهم لسانك كمان
وقت ما حتشوفيه حتعرفيه و حتعرفي اجابة السؤال لوحدك
و ساعتها حبل واقرب كرسي تربطيه في رجليه وعلى صرخة واحدة
عريس ياماي طخيه لكن بشويش :))))))))))))

تامروردة يقول...

دايما ًالأنثى عندها قدرة رائعة على اكتشاف النص التاني، لو حس بتجاوب منها أكيد هاتكون بداية قصة جميلة.

Unknown يقول...

صباح الخير عليكوا
والله انا من رأيي انتهي زمن الفرسان
وكمان لان القرار مش بايد البنت لوحدها في معظم الاحيان فلو جه فارس علي اده غلبان اهلها بعد ما يقعدوا معاه حيفتحولوا الباب ويقولوه اذهب عليك الامان
يعني الموضوع بقي في الاول والاخر انت معاك كام وحتدفع كام
يعني الموضوع كله في الاخر (فارس الاحلام للاحلام فقط)
تحياتي

Sea Lover يقول...

أعتـقد كلمـة فـارس بقت صعبـة شويـة .. لكن مافـيش حاجة مستحيـلة إن شاء الله :)

وكما قال حبيبنا سيدنا محمد (صلى الله عليه وسلم) : " تزوّجـن من كُنتُـن ترضـوْن دينـه وخلقه "

ربنا يرزقك إن شاء الله ويرزق كل بنات المسليمن ^_^

Radwa Ashraf يقول...

دلوقتى فارس صعبة حتين نمشيها فتى أحلامك :)
بس فعلا أهم حاجة أنه يفهمك !!
عارفة ده هيحل حاجات كتيرة, هيفهم انتى ليه زعلانة و امتى فرحانة و بتحبى ايه و بتكرهى ايه ..
بس تلاقيه فين ده بقى؟

ربنا يرزقك بفتى أحلامك اللى يفهمك إن شاء الله :)

إسلام عاطف يقول...

احلى حاجه فيكى يا سميحه
انك مختلفه بجد
حتى فى مواصفات فارس احلامك مختلفه
مش عارف انتى طالعه كده لمين
بس الى انا عارفه والى حاسه انك اكيد انتى كده كويسه
وكفايه انك فاهمه نفسك حتى لو ماحدش فهمك
عشان فى ناس كتير بتعيش وهى مش قادره تفهم نفسها
وناس تانى بتعيش وهى معتقده انها فاهمه نفسها وهى فى الواقع مش فاهمة حاجه
وناس مش قادرة تفهم نفسها وبدور على حد يفهمها
لكن فى النهايه كفايه انك قدرتى تتخطى كل ده وفهمتى نفسك وعرفتى انتى عاوزة ايه
وفى النهايه ان شاء الله ربنا هايكرمك ويديلك الشخص الى يفهمك ويريحك

Angham Salah يقول...

كلماتك حلووووووووه يا سميحه
اما عن كلام شاديه فاحب اقولها ان صعب تلاقي حد يفهمك
وهي دي المشكله
لو لقيتيه فعلا يبقي اتحلت
اما عنك انتي فانا كنت بقول زيك كدهون!!
عوزاه رااجل
راجل يعني ايه
راجل دي يعني كل حاجه اصلا
تحياتي ليكي يا ميحه