مقابل ايه !...........
للي مش زي حلاتي من حافظي أفشات الأفلام،فدي جمله من علي لسان شخصية كانت بتقوم بيها الفنانه الجميله سوسن بدر فى فيلم احكي يا شهرزاد،صرخت بيها فى وش حسين الامام (العريس الصالوناتي الهمام منتشلها من عطن العنوسه) بعد ما أملي عليها شروطه الجهنميه للزوجه المصرية الاصيله،
كان من الطبيعي انها تسمع له حتي النهايه و تسأله بتادب عن مقابل كللللللل هذه التنازلات في إصرار قائله( مقابل ايه!)........
انا شايفه موقفها -سبور- جداً ومنطقي الي ابعد حد ،واعتقد من اليوم ده لطالع أصبحت سوسن بدر بجملتها دي هي مثلي الاعلي !
هحاول ما اعممش الصوره لان مش بالضروره تكون وجهة نظري متناسبة مع الكل ،لكن تقدري كست مصريه تتسائلي ولو لثانية ايه في الحياه اليوميه ينقصك عشان تبقي رئيسه جمهوريه نفسك!
انتي اللي بتشتغلي ،انتي اللي بتحلي مشاكلك اليوميه من أتفه مشكله بالمواصلات الي اكبر مشكله يطير بيها رقاب فى البيت والشغل وبيوت اصحابك لو اخدوا رايك.
حبة منطق ....
لو درسنا الموضوع بموضوعية باحته فأنتي بكل سهوله تقدري تفتحي بيت وتديريه بصوره كويسه حتي وإن كانت ماديا متوسطه او حتي قليله ، تقدري تتبني أطفال لو هاجمتك نزعه الأمومة والاكيد هتبقي قويتي نفسك ماديا عشان تبقي كفء لقرار زي ده ،لان لو متجوزه وأم فأنتي بردو اللي متوقع جدا تربيهم لوحدك لان اي تساؤل بغضب منك عن مدي تدخل الأب في تربيه الأولاد هيتهمك الكل بقله الدم ، لان هذا الرجل الغلبان- بيشقي- عشان يجيب فلوس! مع العلم ان الأكيد انك انتي كمان اللي في نفس البيت بتشتغلي نفس عدد الساعات وبتجيبي فلوس،لكن علي عكسه انتي مطالبه بتربيه الأطفال ورعايتهم ورعايته ومشاركه شهريه في المصروف بإتفاق ضمني بينكم او بكونك مسئولة عن مصاريفك الشخصيه ،وده اللي بيفسره المعظم بكونه مقابل عدم إثاره غضب زوجك ولتعويضه عن ساعات العمل اللي بتختلسيها من حقه الشرعي فيكي هو والأولاد واللي بتضيعيه في كلام فارغ اسمه-مستقبلك-.
ولو بتدورى فى جوزك يكون- سند - فدى حاجه مش مضمونه اوى زي ما انتى اكيد عارفه من تجارب صديقاتك المتزوجات او حتى اللى على علاقه حب بشاب ما ,فى وصمه عار قويه هتفضل على جبينك لكونك بنت بتتحملى المسئوليه هيخليهم يستسهلوا يرموا عليكى الحمل فى البدايه مقابل كلمات ثناء للجميل ,لكن بعد مده هيكون ده الطبيعى و لو ما عملتهوش هتتلامى!
حقه..........
دي الكلمه اللي هتسمعيها لو فكرتي تشتكي من اي حاجه جوزك بيعملها او مقصر فيها من وجهه نظرك - الظالمه طبعا- هتقولها والدتك عشان ما تخربش البيت وهتقولها صديقتك خوفا من ان تلقب -بخرابه بيوت- !
نظره تأمل.........
كل هذه الحقوق أعطاها مجتمعنا المصري للذكور لمجرد اختلاف في عدد الاعضاء التناسليه الحساسه بيننا وبينهم! كنت ساتفهم لو اعطاهم تلك التميزات لندره بنوعهم بغيه الحفاظ علي السلالة! لكن انا ملاحظه وفره فى السلاله والحمد لله فلازمته ايه الدلع المرء بقي!
رجاء........
حافظوا علي سلالتنا حبه من باب التغيير ،لان لو قررت في مره اسال زي سوسن بدر (مقابل ايه هعمل كل ده!) في المعظم الإجابة هتبقي بنفس لباقه وتحديد حسين الامام (هبقي جوزك!) , ساعتها سامحني عزيزي المواطن لو قلتلك زي ما قالت ابله سوسن بالمللي (امشي يا رجل يا عره )
لينك المقاله على جريدة الوطن:
:)
http://www.elwatannews.com/news/details/502764
ليست هناك تعليقات:
إرسال تعليق