الأحد، 17 مارس 2013

علي البر مركبيه !!


كل واحد في اي وقت وطووول السنه لو دور بأقل مجهود ممكن -اراهنه-  انه هيلاقي حاجه تخليه يحس بألم يعصر ضلوعه بقلبه برئتيه ب...... , ويعوجهاله حد التشوه!

كلنا عارفين ان حوا من ضلعك المعوج يا ادم !, عارف ان مدى اعوجاج ضلوعك هينتج حوا من توبك باعوجاج اكبر و مش ذنبها كونها بكل هذا العوج !!
 فاوعي تقولها في يوم من الايام (إنتى ليه سايقه العوج)(ما تعوجيش بوزك).... !
 مش ذنبها !!
حوا اللي اساسها منك تعبت منك كفايه !هي يادوب بتجمع ثمره عمايلك انت و بتقدمهالك بردو انت ,هي يا دوب موصل جيد للحراره !

و لغايه ما تظهر و تبان عليك الامان بتفضل يا عيني مش فاهمه هي كده ليه و علشان ايه و ايه اللي خلاها كده و تتعامل مع نفسها إزاى !
 
# ألم الوحده من غير ونيس ولا وليف ولا أيد تطبطب و تواسى!


# ألم انك تواجه الكل ببسمه جذورها جواك مداها عقله صباع ,لأنك مش مبسوط قد كده يعنى !ومش عايز تشركهم فيك لانك هش في اللحظه دى بالشكل الكافى اللي يخليك تعتزل الكل و تتمختر وحيدا !

# ألم الهجر والجرح والألم ذاته في حد ذاته مع كل أنصاف المشاريع و اشباه العلاقات اللي بتمر بيها لغايه ما تلاقيك !, ولا تغفل مواساه الذات و انك تتعلم مع طول مده معاشرتك بنفسك انك ازاي تداديها و تدلعها و تهننها و تجبلها شوكولاته كمان لو لزم الامر!


# ألم البواخه اليوميه من كل اللي بتحاوطك عينيهم باسئله إجابتها ما ينفعش يكون غير (إعتراض إسكندراني)بتتكسف تقوله علشان تفضل إنسان شيك في عيون نفس الناس البايخه!


# ألم التوجس من الوحش اللي ممكن يجي من اللي قدامك في غفله منك بطيبه نيه منك!او بالاصح رغبه في الإسترخاء من العالم , صعب تقنع حد ايا ما كان عاقل انه يفضل متوجس من الكل طووول العمر,اكيد هيغفل والاكيد انه هيتلدع لدعه زي الفل في غفلته الغير مقصوده دي ,

اللدعه اللي تخليه مدمن علي الارق خوفا من لدعه كمان هتيجى هتيجى!لأن محدش بيحرم اصلا!

# ألم انك تمنع نفسك بكل قوه جواك إنك تحط امل في اللي قدامك اوى علشان ما يكونش ليه مساحه يكسر خاطرك (اوي) ورغم ده بردو تحط امال انه يخلف ظنونك فيه ويطلع هو ده اللي هيكسر القاعده بقى, ويريح بالك اللى نسى بيرتاح إزاى اصلا !, واللي بيكسره دايما هو خاطرك انت وبس بردو!

# ألم الظنون اللي بتنهشك في كل ثانيه قررت فيها تسيب نفسك للتيار,كم المهدئات اللي بتسكت بيها عقلك علشان يبطل يحلل المواقف ويستنتج ويستنتج ويتوقع الصور هتكمل إزاى وليه ومع مين ومين غالب ومين مغلوب في المشاهد النهائيه اللي دايما بتحاصرك ابعادها!

# ألم المعرفه بزياده والجهل الأوفر في كل امور الحياه ,لا اللي فاهم مرتاح ولا الجاهل مرتاح  او علي راي نجاة (لا العاشق مرتاح ولا الخالي مرتاح !),
و قفلت كلامها بردو من غير حل و قالت خلينا من السكه دي علي البر مركبيه 
..............
انت فين يا بر !!!

يا بر جبها لبر بقى !! 


هناك تعليق واحد:

heba atteya youssef يقول...


جميله اوي .. تدوينه بسيطه ومعقده ف نفس الوقت .. يعني تحسي من كتر ما هي بتوصل للي يقراها .. بيشوف قد ايه مشاعر النفس معقده .. بجد مبدعه

اسمحيلي استكملها

أحيانا ً يمر الشتاء في نشوة مستحيلة .. وقلق وجنون علي شئ ليس في الإمكان تحقيقه .. حينها نفكر في الجديد .. فيما آل إليه وضع حياتنا .. فنبحث عن الكمال


هذه المشاعر قد تعتري أي إنسان .. فتمر علينا كما تمر أيام حياتنا


بالطبع أنا أعترف أن الكمال في هذه الحياة غير موجود .. ولكن علي أمل نقول ( ربما في حياة أخري ) ..


تحياتي