الأحد، 20 يناير 2013

حمقي الملذات المختلسه!




و يرن في ودنك فجأه كلام من المجعلص بتاع الكتب ده !, تبص حواليك تلاقي محدش هيستوعبه لو قلته,و النوت بتاعتك ابعد من ايدك علشان تكتبها و تخلص من الدوشه دى كلها شروه واحده !

 و يمكن حتي تتلجلج و انت بتقوله لو قررت تقوله لحد , لانك بتمثل و بتقاوم انك تظهر مشاعرك الاساسيه و انت بتقوله,لان مش كتير بيفهمك لما بتبقي تعبان لانك طول الوقت بتضحك, تقرر تسيبه يلف جوه نفوخك كمان لفه و احتمال يعتق اكتر و يستحق مني اقومله مخصوص مشوااار لحد شنطه الايد و اطلع النوت بوك و اكتبه!!

كمان لفه و كله هيبقي تمام !

تسمع صوتك جوه دماغك بيقوله و بيتنحنح في الفصلات , تبتدي تعمله نغمه بدائيه كده للموشحات الاندلسيه و الكلام الكبير من النوعيه دي, و كالمعتاد الزائر الدائم زياد الرحباني يدق علي بابك و يعبر عن مشاعره ناحيه تلحينك و يعمل اضافاته الخاصه ! ,الاوركسترا اللي في جنب نفوخك الشمال تبدأ تنضف ألاتها في صوت بسيط بلعاه خلفيه مخك الواعي,الواعي جدا لكل اللي بتعمله !

تبتدي تاخد نفس عميق , تتنحنح بلباقه من هو في لقاء جماهير الاوبرا , تفرد ظهرك علشان توسع لشعبك الهوائيه مكان جوه قفصك الصدري المعبق بدخان الايام و حرائق الوقت و الموت صبرا و اصطبارا !
تتذكر اغنيتك المفضله منيتي عز اصطباري! , تقرر ان لا تقلد ايا من يكون عبقريا فانت انت و هذا مباح جدا خاصه و ان كنت مثلي دوما ما تحمل وزر قلبك وحدك ...

اعتقد اني جاهزه للاحتفال بفكرتي في مدرجات عقلي الباطن الوردي لسنواتي الاولي, كإعلان بسيط عن مدرجات عقلي الباطن لسنواتي الاولي , ان كنت من السائحين المحبين للطبيعه  نعدك بفسحه جميله بين انواع من الورود لا تخطر علي بالك رؤيتها او يجول بخاطرك وهم إمتلاكها !, هي محميه طبيعيه وحيده احاديه الوجود ,

 لن تندم ان زرتنا , و لكن المعلومه الوحيده التي ستقبضك ان المكان حرم ملكي لصاحبته (انا) و غير متاح لايا ما كان الزياره !نأسف للتلاعب بمخيلتك و زغزغه نوابع الامتلاك لديك !





نعود لملابس حفلتي لانشاد موشحي الخاص , نرتب الالوان و ما الي ذلك .......................
.................
دعنا نرتب من الاول و نركز علي التفاصيل مره ثانيه ......................

.......................
.................

لنحاول للمره الاخيره ...............


بيــــــــب

 بيــــــــــب
 بيــــــــــــــب 
(محطه المعادي, الساعه 8:55), انا معادي الساعه 9 في المكتب !!!!!

بيــــــــب
 بيــــــــــب
 بيــــــــــــــب
الو ..
انا جايه في الطريق, حاضر هجبهالك معايا اوكى! ...


اغماضه للعينين و توديع مؤسف يليق بلباقه و اكتمال الفكره المشتته الان بلا منفذ

فكرتي العزيزه ,سامحيني لم اكن بالرقي لاتقبلك في يومي المشحون بهم دوما ,
هم........ حمقي الملذات المختلسه

هناك تعليقان (2):

hakame hassane يقول...

فرق جامد بين التقليديه فى التعبير والبذخ ,, جمعت بينهم بطريقه خاطفه ومشوقه جدا ,..

Amr Geda يقول...

اعتقد اني جاهزه للاحتفال بفكرتي في مدرجات عقلي الباطن الوردي لسنواتي الاولي .... بتقووللى حاجات كتير اوووى بكون عايز اقولها ومبتطلعش !!! منيحة منيحة يا احلى سميحة :)