الجمعة، 2 مارس 2012

single..

حالات الوله في عرفي !!
 عباره عن سجن مؤبد بين قضبان الحيره و التوقع و التحليل ,و لأكون واقعيه فلنقول مزيد و مزيد من التحليل !! 
الحيره في تبرير ردات أفعال الأخر , مدي تلقيه لردود أفعالك أنت ! خاصه إن كنتي إمرأه لا متوقعه حال الكثيرات .......( اللي علي راسه بطحه) :)
التوقع لما هو أفضل من قبله , بينما يفاجئك بالأقل فتحزني, أو بالتبعيه حد سقف التوقعات حتي لا تحبطي!, و مع الوقت تفقدي القدره علي التوقع و الأمل فتفقدي إيمانك بالأمر ككل !! إسال مجرب !!........... (يـــــــوه هي البطحه تقلت علي راس الواحد كده ليه ):)
تحليل كل ما بين ذلك و ذلك في محاوله مستميته لإيجاد معادله ما لحل جميع المشكلات! ,أو تفهم كل ردود الأفعال , أو حتي التوقع خيرا أو شرا , ففي الحالتين إما يخيب ظنك في رد فعل أقل منه , إما يخيب ظنه برد فعل أقل لكي !! و الرضا هو أهم ما في الأمر !!........ (أمر! أنت بتقول أمر ...يبقي إنت اللي قتلت بابايا :( اااااااه يا بابايا :)(:...... قلش رخيص  ) 
و اخيرا حين تفشل !
          تظن بكونك فاشل ! 
                 بينما الموضوع ككل فاشل !!
 .....................
لا اقتنع بفكره الكمال الإنساني بوجود شخص ما بجانبك !!
سمعاك يا اللي بتقول معقده!!!!!!!:(
 لسبب واحد , وحيد, فريد...... و محمد و جمعه و خالتو و ماما و نجوي بيهنو تيته بطقم السنان الجديد ........... قلش قلش رخيص بردو  !!
حبه جد بقي ....!
 إن امكانيه تأكدك التام إنه هيفضل جنبك شيء من المحال !! ,إن لم تكن خيبه أمل هتلحقك من موقف ما هيعمله بقصد أو من غير قصد !! أو منك تجاهه ما هو احنا مش ملايكه بردو يعني الحق يتقال , كتير مننا عاوز جنازه يشبع فيها لطم !!,ان لم يكن هذا او ذاك هيكون الموت !!, النهايه الطبيعيه لكل و أي حاجه في الكون , أو الحقيقه الوحيده زي ما كل الناس بتقول و انا كارهه أصدقهم !!!.
معلومه صغيره ..................انا لغايه دلوقتي بقنع نفسي إن خالتو مسافره و مش ماتت , لأني مش متقبله فكره إني مش هشوفها تاني يوم ما توحشني !, لأنها ما قدرتش تستني أشبع منها كفايه !, لأني عمري ما كنت هشبع عامه !!
 الله يرحمها و يرحمني :)
 ........
لاني قررت اعيش و ما اقفش قدام الحيطه و اقول اعدي ازاي !, كان لازم أخد قرار في الوضع اللا مفهوم ده !!
 يوم ولادتي لم ألد كتوأم , خلقت وحدي لاشق طريق ما, كتب لي وحدي ايضا !!
 إذا فليكن !!!
 لذا أقتنع بكل يقين من أن حال كل منا بلا حبيب , ليس بالطامه الكبري حال كثيرون من محبي الدراما !!!
 انا بكره الصعبانيات و بكره فكره البكي علي الفاضي و المليان و بكره و بكره !!!
 بس عمر ما كان قانوني الكره في المطلق !!!
(ان لم اكن فرفوشه لوددت أن اكون فرفوشه النعنوشه )....
.............................

احم احم .......لنوقظ الخبرات السابقه و نتكلم من وراء نظاره ما !!! 
لنفترض جدلا بكونها ذات فريم إرجواني !!!
توحي بالسواد و لكنها حياتيه جدا !!, لا ألعب دور ناديه لطفي في النظاره السوداء, فلنقول النظاره الإرجوانيه !! .
من فتره سألتني إحدي صديقاتي اللا مقربين جدا ,عن رأيي في العلاقات و الحب و ما شابه !!, بعيدا اني اصبت بالملل و الإحباط فهو سؤال مكرر ورخم !, و عاده بيعقبه سؤال أسخف لو شكرتي في الحب و العلاقات ! (إنتي مرتبطه بقي ؟إسمه ايه؟), بس اللطيف إني تفاجأت بحالي أصيغ لها الموقف بصوره متكامله متشابكه ظريفه سهله للفكر, دون تعصب لجنس ما دون أخر !!, لم أرتب كلماتي قبل ذلك فكريا ,لكوني أحتقر السؤال عاده, و أمتنع عن الرد تحقيرا من سائله !, لكني أجبت بكل لا تجميل !, فقد أعلنت سابقا إني أكره الذواق !!!. 
........ عزيزتي السائله ............ بعد تنحنح بسيط.........
أقتنع بأن حالي بلا حبيب !, كتورته غلفوها بأحلي المقبلات و الكريم جانتيه (جوانبي الطفوليه ) ,و لا نتناسي النصف الغارق بالشوكولاته السويسريه الأصليه (my black side ) الذي يبقي رغم كونه غارق بسواد الشوكولاته , إلا إنه مرغوب من قبل الجميع , فلم أصادف أحدا ما !بوقت ما !, يكره شوكولاته سويسريه ما !!
أما عن العلاقات الإنسانيه الطبيعيه التوحشيه!!....:)
خجلت من ذاتي حين وجدتني أشبهها بكريزه التورتايه !! كم من مقبلات تفتقد للكريز و تبقي أشهي المقبلات !!,فما أكثرها أساليب التزيين ,المبتكر منها و اللا مبتكر !!, و لكن هي التي تبقيها جميله و مقبوله من العامه و قابله للعرض بأي سوق أيا ما كان مبغاك في العرض , و تجد لها كيالها الذي يقدر فيقتني !أو تتلاعب به الظنون بالإمتلاك!!
و لكوني أعلم بأني قد أجهدت في صناعه أشهي تورته قد يهتدي لها لبي و أسميتها سمسم !!
اذا فلتسامحونني حينما أطالب بعرضها في أسواق خاصه لإناس خاصه الخاصه  بقوانين خاصه !!
فهي ................صنع إيديا و حياه عينيا :) 
مع حبه نرجسيه علي الوش ما يضرش يعني :)


مما لا شك فيه اني مش هوطد علاقتي بالبنت صاحبه السؤال لأنها بتقلب المواجع !!, و بتحرك البطح!! 
الحاجه صاحبه السؤال ... حسبي الله و نعم الوكيل :)
ويجي حد بعد ده كله و يسألني إيه رايك في الفلانتين !!
 مما لا شك فيه إنه مكروووووووووه, مكرووووه ,مكروووووووووه . يا ولدي :!!  ولا مستحب حتي إشعار أخربقي  :)

هناك 3 تعليقات:

مصرى حر يقول...

الخروج من قفص الذات مطلوب لإن الحياه مش تورته وشيكولاته سويسرى

التورته والشيكولاته السويسرى هما احدى وسائل الاستمتاع بالحياه

عرفة فاروق عبد لله يقول...

حلو الكلام ده دمه خفيف

ومع ان وجهة نظرى قد تخالفك قليلا فيما يتعلق بالحب ـ نظرا لكونى شاعر ـ

فده بردو ميمنعش انى ابتسم وأنا بقرأ الكلام ده

على فكرة مكنتش اعرف ان الشوكلاته اصلها سويسرى

فى اكتر من بوست عندك فى ملاحظة خفيفة بلاحظها هبقى اقول عليها بعدين _ بس أعتقد انها هتبقى فارقة كتير فى ارائك بعدين

والتورتاية تبدو لذيذة بالشوكلاتة ومعرفش ايه هو الكريم جانتييه ده ... هو بتاع شـَعر !

khaled nagy يقول...

ف المجمل عجبتنى ...مميزه كالعاده
واكتر جزء عجبنى
أقتنع بأن حالي بلا حبيب !, كتورته غلفوها بأحلي المقبلات و الكريم جانتيه (جوانبي الطفوليه ) ,و لا نتناسي النصف الغارق بالشوكولاته السويسريه الأصليه (my black side ) الذي يبقي رغم كونه غارق بسواد الشوكولاته , إلا إنه مرغوب من قبل الجميع , فلم أصادف أحدا ما !بوقت ما !, يكره شوكولاته سويسريه ما !!
أما عن العلاقات الإنسانيه الطبيعيه التوحشيه!!....:)
خجلت من ذاتي حين وجدتني أشبهها بكريزه التورتايه !! كم من مقبلات تفتقد للكريز و تبقي أشهي المقبلات !!,فما أكثرها أساليب التزيين ,المبتكر منها و اللا مبتكر !!, و لكن هي التي تبقيها جميله و مقبوله من العامه و قابله للعرض بأي سوق أيا ما كان مبغاك في العرض , و تجد لها كيالها الذي يقدر فيقتني !أو تتلاعب به الظنون بالإمتلاك!!