الاثنين، 26 سبتمبر 2011

اذا انا محظوظه :)


احم احم احم ...
حجتي اللي دايما بلجأ ليها , لما اقع في مشكله اني مش عارفه اروح فين ولا اجي منين! ( شخصيه سميحه المحتاسه , رمز علامه التعجب ! في العمليه الانتخابيه )

كنا مع فاصل اعلاني و الان نواصل :) 

كان يوم غريب , بس مش اوي, ممكن أئكد مدي غرابته بمدي غرابه تفاعلي مع أحداثه , يعني بانعكاس مواقفه في مرايتي !!
ما انا مالي بمرايات الناس يعني !!
 ربنا قسم الارزاق الكل اتضايق , قسم العقول الكل قال يا عقلي يا فلااا!! اذا فلنعلي صوت الاستريو يردد اغنيتي المفضله ( سلامتك يا دماغي !!!!).

كنت فعليا مش مستوعبه معظم الاحداث باليوم , ردود الافعال كانت بمثابه كلام لكبار بالسن بينما لا افقه كطفله سوي كلمتان (  ماما, امبو , و مهاتره هقول اتفو !!! بما اني كنت طفله معترضه من زمان!!!! ), كان يوم عملي مرير , متشابه مع كثير غيره , مع اكسترا وجع ظهر و حرقان في العين!!!
و رش علي خفيف علي الوش كدهوه لجل الذواق يعني , شعور بالضياع , وحشه رتابه , ملل , لا جدوي من لا شيء , لا انساني علي الإطلاااااق ( علي الطلاق !! بالثلاثه :) )

نهيت اليوم بقوه بالغه , تؤهلني اني اروح البيت, و استعد لمشواري مع ماما ,لزياره خالتو ( ربنا يقومها بالسلامه يا رب:( ), ركبت الباص بعد ما كنت ابتديت اشك في مدي قوه نظري ( مكتوب عليه قسم الحدائق !!) ده هيروحني لغايه البيت تقريبا !! غرييييييييييبه , مع اول وضع لقدمي بالاتوبيس ,سالت(  هو فعلا رايح قسم الحدايق !!)  
 ( اه يا بنتي !) 
 صوت داخلي جوايا ( هييييييييييييه و الله و لعبت يا سمسم !!)
بدات بالترقب المعتاد لاي كرسي فاضي , ارتمي عليه و اريح ذراتي المجهده اللاعنه لكل محددات الحياه !!, اهوه كرسي هناك اهوه !!!, كرسي خمسه بس اوكي ما يضرش !! , اللي يجي منهم احسن منهم !!(ضمير غائب عائد علي الجيش حاليا و الحكومه سابقا !!! ). الكرسي كان ضيق اوييييييي, رجلي فعليا علي رجل الست اللي جنبي , كنت لابسه جيب واسعه ( كانني بمثل لقطه من اوبرت انا قلبي دليلي دليلي !!), جلست و سماعاتي لا زالت بجيبي ( الرصاصه لا تزال في جيبي ) , اذا مهربي المحبز دائما اهل لان يستعبني !!
 مع اول اغنيه, بدات تتحدث الي بحديث هادي و متزن و مرح !!!,غريبه في ايام زي دي !!, المفروض الكرسي الاولاني يبقي زي الاخير , مندس حمار اللي مصممها !!
ابتسمت بهدؤ , انا لست من محبزي بدء الحديث بوسائل النقل , عاده بيبقي حديث ( نسوان ) و انا لا اكره اكثر منه !!, لكنها بنت في مثل سني بالتقريب !!.لذا رديت بهدؤ , فعلا  غلطان!!!!
صمــــــــــــــــــــــــــــــت , لا مفتعل !! فقد كانت منشغله في مراقبه الطريق بانغماس , بينما استمتعت انا باحدي اغاني علي السريع , و فجاه بدات من جديد !!! هو فعلا موضوع النيزك ده صحيح !!

 لا انا سمعت في النشره النهارده انه اشاعه !!

طب ايه غايتهم في ده , انفلونزا الخنازير كان غرضها دعائي علشان الناس تشتري صابون و ديتول !, انتي عارفه الديتول كان بكام ساعتها ! كان الناس اخرها تمرش جسمها باي صابونه و لو يعني اتمعظمت شاور جيل من الجراكن دي !!

نظرات مذبهله , مش عارفه و الله فعلا , بس انا ارهقت الصراحه من نظريه المؤامره دي , انا اسهللي اتجاهل اللي ما يقنعش عقلي و اعيش بلا ادني تانيب ضمير اسهل !! بكره فكره الضحيه دي !!

عندك حق و الله ,الواحد دماغه بقت زي القلقاسه !! انتي بتشتغلي ايه ؟, ركبتي من انهي محطه؟؟

انا مهندسه معماريه في مكتب استشاري , من عند التامين الصحي !!

اهااااااااااااا( و كانها حللت شخصي بكل وضوح !!!)

تفتكري هنفضل قاعدين طول الطريق في الحشره دي !!, انتي نازله اخر الخط زيي !
و كانها بتحجز مؤنس وحده !! 

هو اخرالخط ايه ! انا نازله قسم الحدايق !!

ايوه اخر الخط قسم الحدايق , زيي !! طب تمام اوي( ابتسامه منفرجه الاسارير !!!)
تفتكري هنفضل محشورين كده للاخر !! 

اعتقد معظم اللي راكبين نايمين , يبقي اكيد متطمنين انهم نازلين اخر الخط!!اعتقد هنفضل محشورين !!

مهندسه مهندسه يعني ! بتحللي و كده يعني !! انا بقي خريجه حقوق !!

ابتسامه زائغه مع قليل من الحيره للبحث عن اجابه مناسبه ( ما اقصدش و الله , اجدع ناس  و الله حقوق اخويا هناك !!)

كان الحديث اكثر من مسلي , مررنا علي ارض المعارض و بالتاكيد الطريق كان في غايه الزحلفه !! ماتش الزمالك بقي و الاستاد موقف الطريق !!

اهلاويه ولا بقي !!

ماليش في الكوره !!

ولا انا!! بصره :) , كل شويه يقوللي رايسي في العمل ( و النبي انتي جادعه يا رشا انك مش رياضيه !!)

اذااا اسمها رشا , اصريت اني ما اقولش اسمي الا لو سالت !!!

من حوار عن العمل , لحوار عن الاهل , لكيفيه تصديها لقله الحيله و قدرتها انها تمشي البيت اثناء ما مامتها و باباها كانوا مسافرين شرم يهدوا اعصابهم !! ( اذا هي من عيله شبه مرفهه و بتحترم الحريات الي حد ما ( مش معقددده يعني ) ) ,
بدات تشرحلي كانت بتعملهم اكل ايه !, و ازاي اخوها صلاح كان بيقوللها نفسه في فرخه مشويه !, تفاصيل ممكن الكل يقول عليها تافهه , لكن فعليا لمعه عينيها و عفويتها المفرطه و روحها اللي مليانه اوي , خلتني اتابع كل تفصيله بكل شغف , و اعتراف ( اتمنيت الطريق يطول ) 

وصلنا بسرعه اويييييييييييي , و جت اللحظه الحاسمه !!, اتمنيت و احنا بنسلم علي بعض تطلب مني رقم تليفوني ,او انا اتشجع و اطلب رقم تليفونها !!, شرحتلي هي ساكنه فين تحديدا , و عزمتني اي وقت ابقي معديه , اعدي اشرب معاها كوبايه قهوه من عمايل ايديها !! , قررت في عقل بالي اني اكيد مش هعمل كده , زي ما كوني مش هندم اني ما اخدتش رقم موبايلها , لاني عارفه ان الصوت اللي ينقصه الصوره قاصر جدا جدا جدا ,و لا يساعد علي التواصل اطلاقا , في رايي زي اختراع الشات الغبي اللا حميمي, لا حميمي في قانوني يساوي لا انساني !

ابتسمت ببسمه لا تقارن بعد ان ودعتها , و نويت ان اتلفت عنها في كل وسيله مواصلات , بنفس الموعد, في طريقي الي المنزل كل مساء !!
 قررت اني ادعو لها هكذا, بان يصلح حالها و يهديها ,و يبعد عنها ولاد الحرام و بنات الحرام , لان بطفولتها تلك, اكيد هتقع في ردات فعل تخذلها كتير !!(فكرتني بسكريبت ابن حلال من حياتي ) , حسيت مع انها اكبر مني بشهرين او تلاته  و ده اللي عرفته من كلامها , انها اختي الصغيره كثيره الكلام , كثيره المرح كذلك!! 
 دعوت ان يضل بعيناها الضي , و لا ينطفيء ما دامت تحبو بدنيا التجارب! 
 اخبرتني انها تعاني من نفس مشكلتي, و هو الضغط لتتزوج !! اخبرتها اني اعاني من المثل !,و لم اذكر اي تفاصيل!, بينما انهالت علي بكل تفاصيل مفصله عن كل بسمه اهدتها لعريس صالوناتي ما !!!,تعجبت ان كل تلك الكتله الانسانيه المحبه للتعارف و الايخاء, لا تقوي علي تكوين علاقات حياتيه قد تقودها الي زواج طبيعي :) 

اعترف كمان اعتراف , وحشتني رشا !!, بتفائلها اللا مشروط, عفويتها اللا مقيده بعقل , حبتني فيها !! 

انا محظوظه بقدري اللي ساقني ليها النهارده , و خلاني اسبلها فرصه تختم بالسعاده ابعاد اليوم !!! اذا انا محظوظه :)

هناك 3 تعليقات:

عرفة فاروق عبد لله يقول...

على فكرة جميلة قوى شخصية رشا


بحب الانسان العفوى الطيب اللى مبيبنيش حياته على معرفة صالونات وبيسيبها للصدفة زى معرفتك بيها مثلا
وجميل انها ختمت يومك وسابت فيه شوية فرح

خالد ناجى يقول...

جميله رشا

وقليل من هم مثلها

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول
غلا الروح
شات غلا الروح
شات صوتي
شات مغربي