الاثنين، 19 أغسطس 2013

انتبه من فضلك المجارى هتطفح !

فضفضه شخصيه باحته اشبه ما تكون بمصالحه على العدم بس بصوت عالى !
او نقول محاوله لدفع العفاريت النفسيه :)

بعد كل فتره ضغط نفسى بقصد او من غير قصد منك لحالك بهواجسك بسلطاتك ببابا غنوجك او من معاملتك مع الناس ,لحظه إنهيارك هى اللحظه الوحيده اللى بتعرف فيها مدى قدرتك على التحمل لان انت الوحيد اللى عارف امتى بدات عمليه ضغط السوسته وانت الوحيد اللى عارف ان دى إنطلاقه خلاصك من الضغوط  وخلاص الضغط كمان منك لفضاء اوسع هيركن فيه على كتف حد تانى (للأسف)!
السخيف ان عمرى ما عرفت( الحصاله) بتاعتى سعتها قد ايه, بس اعتقادى الاكبر إنها مطاطيه لانها احيانا بتطول المده لدرجه انا فيها بنبهر من نفسى واحيانا بتبقى قصيره جدا لحد التفاهه, عاده بسميها مده تحضير الوحش !

وحاليا هنجرى التجارب على كائن إنسانى زيي و زيك الا وهو انا (اللى نعرفه احسن من اللى ما نعرفهوش)!

 بتبقى الكيفيه كالتالى تراكم ثم تراكم ثم تراكم ,ثم محاوله عمل هدنه مع النفس,ثم إنفجارات صغيره بتنبه بقرب الإنهيار الأكبر ثم محاولات لعمل هدنه تانى,ثم إنفجار وقتى مروع على التافهه (ايون باجى على التافهه وبتصدر ) وهنا تكمن المشكله لانها صعبه التوقع ومفيش مقدمات مقنعه للاخر يتخذهالى اعذار !فتخسر وبس !
الجدير بالذكر ان لو تخلل كل المرحليات دى سفريه لمده تلت ايام في اى مكان بيبقى كفيل انى الف الدايره من جديد وابدء على نضافه !

محاوله تحليل:-

اعتقد موضوع طول المده مش لأن خلقى مطاطى او زي ما بتقول فيفى عبده في كيد النسا (خللى خلقك استريتش) لكن اعتقد انه بعد مده من التحويش والتراكم بيتعمل -ريفريش- للوندوز وبنشيل الفايلات المؤقته من الميمورى عشان البروسيسور يستعيد نشاطه شويه ,واعتقد بردو ان من الامور القابله للحذف في عمليه الريفريش دي بتبقى الخلافات العابره مع سواقين الميكروباص على التحرشات الطفيفه مع زملاء الكفاح في المواصلات ,على حبه استظرافات في الشغل على كم لا يهمل من خيبات الامل وكسر الخواطر اللحظيه لاى سبب كان مش فكراه فعليا عشان انا مسحته من غير ما اقصد !

لكن انا افتكر صديق ليا قاللى ان بعد كل فتره لازم تنضفى المجارى او تتخلصى من الصندوق الاسود لمشاعرك وتجاربك السابقه وانه يشرفه يكون الزبال بتاعى او عامل المجارى بتاعى !وده كان عرض منه انه يكون بئر اسرارى لكنه حاول يكون مبتكرواشكره على المحاوله!

كان عرض يليق ما انكرش واسلوب طلبه للمنصب مغرى جدا لكن كان ينقصه  السبب الاساسى اللى يخلينى اتكلم! وهو إنى اثق فيه وأئمن وافتح له كل خطوط الوصول لدماغى وانا مأمنه ومسلمه انه بكل الخيوط اللى في ايده دي مش هيستحلى لعب العرايس ويخلينى بشكل او باخر في غفله منى وظن خير فيه مجرد- ماريونيت- !

عشان كده بنتحول مع الوقت زي ما قالها في فيلم -you have got mail- (انتى خوصه في مهب الريح متشبثه في الارض بكل قوتك)!

هى حاجه شبه كده بس بردو تظل مش مرضيه :)