التعقل داء منيل بنيله !
فيها ايه لما اطلق عنان جناني و اتجنن!,فاتعصب باريحيه منغير ما اداري ايتها شعننه , و احتمال كبير اكسر اللي حواليا بنفس الاريحيه السابقه !
ساعتها لو في لحظه قرت اهدي و اقحم راسي جوه التلاجه و اكل مربي التوت او الشوكولاته باريحيه اللي ما بتعملش ريجيم ولا يهمها انها بتتخن من الهوا الطاير و الميه بتاعه ربنا !,ساعتها اكيد مش هبقي مضطره ابرر لحد موقفي اني منين عصبيه و منين هديت و ليه باكل بالاداء الحجري ده !
ساعتها هيبقي بردو من حقي ابرق للكل في نظرات استنكار منغير ما استشيك و البس نظاره شمس واكله نص وشي ما تبينش انا قد ايه قرفانه منهم !(في المترو,في طرقات المترو,في الشارع, في الكافيهات , علي الفيس بوك,علي التليفون ,حتي في احلامي يا كفررره )
ساعتها بردو متاح ليا جدااا اجري في وسط الشارع منغير ما اتكسف من حد و لو حد اتعرضلي بكلمه او غيره ,هيبقي بردو من حقي اعضه في نفوخه و اجري او امسك اقرب بلوكايه طوب في الارض و ازقله بيها !و ساعتها هضحك و اكركر و امسك بطني من كتر ما هتوجعني من الضحك
ساعتها هعرف احقق حلمي و ارقص في وسط الشارع بالفستان السبعيناتي اللي نفسي فيه !
ساعتها هحضن اللي احس ناحيتهم بطاقه خير في الشارع و اللي اكرههم هشتمهم بكل ما اوتيت من قوه !و اطلعلهم لساني و ازقلهم بردو بمسدس الميه بتاع زمان و هتبقي ميه مش نضيفه بقي (ان عشقت اعشق قمر و ان سرقت اسرق جمل)
.............
من فتره اتناقشت انا و صديقي انا انهي شخصيه كرتون تليقلي اواليقلها الاصح لان العالم في اصله كرتوني واحنا النهج المخالف الملحد عن الواقع, هو اختارلي (بوه) بتاعه شركه المرعبين المحدوده !
, قلتله ساعتها كلك ذوق و انسانيه بس انا يليقلي اكتر شعنونتي ,استغربني جدا لما اردفت ببهجه اللي لمس نور الحقيقه الكبرى ( انا شعنونه الشعانين المتشعننه بشعننه اوفر , لكن برواقه !)
يعني علي راي احمد السقا في حرب أطاليا (اتعصب بالراحه ,اتنرفز بشويــــــــش يا بكوغتي)
شعانينو برنسه جدا علي فكره : سبكم من (المزمبليه) العجيب بتاع شعرها لكنها مرتبطه بكورتي البعبع اللي بيحبها جدا لدرجه انه سعات بيغير من نفسه!, بيحب كل تفاصيلها مع انها شعنونه ,بيعرف يهديها و هي شعنونه و بيستحملها كمان وحظها الاكبر فيه بقي انه بيعرف يعتذر لما بيزعلها , كورتها البوعبوع واد شيك و رقيق و بيحطلها في كل خروجه عفن الليالي و كلب مبلول و كمان عدسات لاصقه لعينه الوحيده !
شعانينو انتي بيضالك في القفص يا مضروبه و تلاقي ولنتيش عارفه!, و تلاقي هتقضي فلانتين لا قبله ولا بعده يا بنت المحظوظه!!,
(حقد طبقي متصالحين معاه)و علشان اقربه لتصوركم اكترالحقد ده فهو يشبه لحقد اصحاب محمد هنيدي عليه انه في دبي في فيلم عندليب الدقي!
يسرا يا عزيزتي لما كنتي بتصوري فيلم ضحك و لعب و جد و حب مع الممثل الفاشل عمرو دياب جوه اوضه عزل الصوت,كنتي في الجنه يا عبيطه و لحدش قالك ,ولا كنتيش عارفه و لا مدركه لده اكيد !
قرار جمهوري: ادراكي للامور لو اتاخر تلت ثواني عن الحقيقه هولع في نفسي لاني مش عايزه ابقي غبيه زي يسرا و شعانينو ,
و بجمله الادراك فانا مدركه جدااا اني نفسي في كوره شعانينو البوعبوع الشيك و في اوضه يسرا و في طلاقه سعاد حسني اللي بتضحك دايما و بتجري وقت ما تحب وبكده يبقي اتعشت يا معلم !
و الله علي ما اقول شهيد هااااااااااااااي هيء(باداء فؤاد المهندس )
هناك تعليقان (2):
احلى حاجه الواحد ممكن يعملها هى لحظات الجنان اللى بيخطفها من الدنيا
على اختلاف الافكار يعني :D
صحيح في قيود الواحد لازم يلتزم بيها لكن جنونه بيديله الدافع انه يدور على الحلول البديله
لما الواحد فينا بيتجنن وبيعمل حاجات كدا في الشارع الناس مش متعودة عليها ويلاقى كل الناس بتبص عليه بيحسدوه لأنهم ماعندهمش الجراة يعملو زيه
كويس ان الواحد يعرف دواخل نفساويته واشباهها الكرتونيه .. انا بمثل نفسي بـ شلبى سلوفان :D :D
لا انتي فعلا شخصية كرتونية
:))
إرسال تعليق