هرتله

هــــــــــش اهدى بس !
لما بخاف بجد و يتملك من كل اطرافي و مشاعري ضباب غريب ملهوش نهايه , بعرف ان خلاص راحت مرحله ان حد يعرف يطمني , و لو بصينا لده بنظره انسانيه فيها حبه امل في اللي حواليك انهم عايزينك احسن , اقدر اقول اني بكده ضيعت مجهود الكل و طموحهم في التغيير مني سدى و هبااااء

انا دلوقتي خايفه بس مش اوي يعني!(او حابه اصدق انه مش اوي يعني علشان اعرف اتعايش مع خوفى ده ),و لو حبينا نقولها بالنحوي علشان نبقي شيك فنقدر نقول( لدى بواقي امل في حقائبي الملونه الصغيره, لذا لن ارتب حجرتي الي زمن لا اعلم مداه حتي لا تهجرها بعضي التي لا بد لي بالتمسك بها حد الموت لاني و ان تركته فساموت حقا). :)
.................
دور اللي متزرزره من الكون و ان الكل علي راسه بطحه و بيحسس عليها و انت الكائن الصح الوحيد (ده كلام اهبل و مش حقيقي )!

اكيد في اجابه في مكان ما هتبررلك انت قد ايه بقيت منبوذ و ليه , اعتقد الافضل انك تحاول تدخل الدايره او بالاصح تحشر نفسك فيها لان انت الوحيد الخسران بكونك براها , او حتي دور علي دايره تليقلك المهم ما تبقاش لوحدك و خلاص, علي الاقل لاقي حد يسقف لجنونك ده و ان كان مجنون زيك ,

 المهم الخيارات اللي قدامك هي اما تؤمن بجنونك و تدور علي ناس تليقله اما تفقد ايمانك بيه و تكون وسطيهم مموه بينهم و خلاص و بالنسبه لجنانك فخليه يا دوب يديك اضافه بينهم بس ,حتي و ان كنت انت الوحيد اللي شايفها اضافه مش قطمه من وجودك بينهم تخليك ناقص عنهم حته !
....................... انا و من بعدي الطوفان مش حقيقيه علي فكره لنفس السبب السابق فمش هرغي كتير,
خاصه مع كائن محبط للامال (بالغلط) و في نفس الوقت  بيصعب عليه كسر الخواطر ,و المصيبه الاكبر انه ما بيعرفش يعتذر !
يعني كائن موجب و سالب او نقول سخن و بارد في التوقيت نفسه , بس لا هو متعادل بكونه حدين لكن نقدر نقول ان روحه دايما متبستره  !!
خيــــــــــــــــــر , هنقول ايه غير سبحان الله و له في خلقه شئووون :)

المشكله انك بعد فتره طويله مع نفسك(اللي هي منتهي التناقضات) و بعد فتره اطول مع ناس(اللي هم يا ابيض اويييييي يا اسود اوييييي يعني  حتي و ان كانوا بيمثلوا العكس فهم بردو منتهي التناقضات), بتعقل و ترسي و روحك بترتاح و انت بتسمع تبرير اي حد عن اي حاجه ماداااام  بيتكلم بصدق ,بتعرف تلتمسله اعذار , بتعرف تقوله معلش انا فاهمك و مقدر موقفك , بتعرف تكون انسان من الاخر, الانسان اللي ما بتلاقيهوش في اللي قدامك عامه, لان معظم الناس مرضى بالتطلب في معظم علاقتهم....

اهم حاجه كون صادق في كلامك و مشاعرك حتي لو بتتكلم في هرتله سوده و صدقني هتلاقي اللي يسمعلك ,
زي حلاتي مثلا كده !, اديني مثال حي قدامكم عن الفم المتحدث بالهرتله الكبري و ادي صفحتي البيضه بتسمعني و عماله تقوللي قوللي كمان يا ست !
 كل ما كلامي يكتر تزيحلي بشياكه سطر كمان جواها و تقوللي هــــــــا و بعدين , فاتشحتف و اكمل  و اتشحتف تاني و اكمل اكتر , علشان كده لما بقفل معاها بحب ارمي عليها سلام اصحاب جدعان من اللي هو باربع بوسات ده ,لان الست بصراحه استحملت كتير و ده اقل واجب يعني :)
هـــــــــــح انا تعبت من كتر الكلام فسلام جدعان بقي يا حبي :)
مووه
مووه
مووه
مووه
ولا نقول تلت بوسات سنه !!
بي اس: (ما بفهمش مال السنه بالبوس بس في بنات قالتها كتير قدامي و استقبلهم نفس الوش اللي عباره عن عيون مبرقه و بس)