الأحد، 22 يوليو 2012

احيييييييييييييييييه


انا تعبت مني اصلا يعني !!,
 و كل ما افكر القي بعض اللوم علي اللي حواليا انهم شاركوا في وصولي للحالات دي ! ,سواء بكلامهم الجارح عن نقط واقعه في تكويني حاليا,بغرض طيب منهم انهم يبنوني بس كانوا اغبيه و اختاروا الوقت الغلط , او بغرض شر انهم يهدوني و هم عارفين انها اللحظه المواتيه لده !.
ريحه وجعي دايما فايحه !!
كتير بكره اني مقريه اوي, خطوط لوحتي يفهمها اي بني ادم معدي و معاه سندوتش طعميه بيتسلي فيه !, كنت بتخيل زمان اني لوحه سرياليه مش اي حد يفهمها , بس بسبب يقيني ده خليت مبداي بسطها تستبسطها ! و ده كان بردو غلط !!.
بكره القوانين الثابته لانها ثابته اوي و انا مش ثابته فبتفرسني و بس !
كل ما الومهم جوايا بصوت او من غير !,تصحي الحته الطيبه اللي فيا او خليني اقول المنطقيه اللي هناك في بيري النفسي ! و الاقيني بقول كتر خيرهم انهم قادرين يتعايشوا معايا و انا كده!. كده ده اللي هو ازاي مش هقدر احطلكم خطوط واضحه!! , لاني زهقت اوضح اللي المفروض يبقي واضح لوحده من غير تدخلي !, زهقت اتدخل فيا زي ما زمان الانسان اتدخل في تكوين الارض فخرب العالم و خرم الاوزون !
اهو انا دلوقتي عندي خرم في مشاعري !!و ده نتيجه محاولتي تصليح او تحسين اللي اصلا اتخلق مش مظبوط!!

انا حاسه اني نفسيا اتكونت من قصاقيص مشاعر و خلاص! , تقفيل اي كلام كده و خلاص علشان نطلع بنت يتنادي عليها بمسمي بناتي !!, مش معقول كان متركز معايا اني اطلع كده اصلاااااااااااااااااا
لان كده ده لا ليه مثيل اقارنني بيه فاعرف انا فين و منين و هوصل امتي و قربت ولا لا ! , وكده ده وضع قائم و خلاص !!
لا عاجبه كده و لا كده ولا ....................!!!!!!!!!!!!!!!
وتلاقي الكلمه الوحيده اللي بتتردد في دماغك في كل فاصل بين صفحه لروايه نجحت تنسيك انت ! ,و صفحه تانيه هتخليك تنسي من تاني لان حاجات كتير مش لطيف نفتكرها  علشان بتفكرنا بعجزنا اننا نخليها احسن و بردو ما نعملش اخرام اوزون تاني في مشاعرنا !
اذا احيييييييييييييييييه اسكندراني عتيقه الصنع !!

هناك تعليقان (2):

Unknown يقول...

احم

حلو البوح والفضفضه دى

اعتقد مجرد البوح يشيل كتيير من اسبابه
----------------------
ال يعيطكى معلومه او نصيحه بغرض بنائك...حتى لو جات ف وقت غلط ...لازم تقدرى ده..وتستخدميه ..طالما عارفه انه صح وانه لمصلحتك...اما ال بيعمل ده علشان يهدك ...وانتى عارفه ده ..اضربيه بالشبش الاخضر بتاعك ده
-------------------------
كونك بسيطه ..وواضحه..ومقريه ...ده مش عيب ....ده جميل

لو ف عيب يبقى العيب ف ال بيستغل ده لاستنزاف مشاعرك


خليكى بسيطه وواضحه ومقريه ..ولكن بردو خلى الشبشب صاحى علشان ف ناس مينفعش معاها الوضوح ولا البساطه
-------------------------

بالمناسبه كلنا مليانين كلاكيع قدددد كده...يعنى لو انا مستحمل كلاكيعك...فانتى كمان مستحمله كلاكيعى

فكتر خيرنا جميعا

يعنى لما تحبى تلموى حد ع حاجه لومى وانطلقى ..لانه زى ما انتى شايفه انه مستحمل حاجه فيكى ..فانتى كمان مستحمله حاجات فيه

محدش فينا ملاك

ولازم توضحى اى حاجه تحسى انها مش مفهومه

ومتقوليش المفروض تتفهم

احيانا الغباء بيسيطر

وكمان الذكاء نسب ف البنى ادم

-------------------
اما عن قصاقيص المشاعر وعدم معرفه اتجاهنا واحنا مين

فده سمتنا كلنا

مش لوحدك ع فكره

اوقات كتير بنحس نفس الاحساس

بس الفرق انك لماحسيتى ده كتبتى التدوينه

احنا بقى مكتبنهاش :D

اما عن خرم المشاعر ...فده خرم داخلى ..يقدر ينسد بخروج مشاعرك للاخرين

لان اعتقد ان المشاعر دى الشىء الاكيد فيها ..انها بتعمل تغذيه عكسيه فظيعه

المهم تتوجه ناحيه الناس الصح
---------------------

لما تقرى روايه عيشى معاها ..واعتبرى نفسك بطلتها

بس اوعى تقارنى نفسك بيها

علشان دايما هتلاقى بطل الروايه احسن

علشان ده خياااال يا جميل


:)

ENG./ELSAYED,PMP يقول...

يا ستى خدى نفسك على عيبك وخلاص :)