الأحد، 30 أكتوبر، 2011

خوف !


ما تقعيش جوّه نفسك يا سميحة كده !!

مفهوم إن الحياة سخيفة وبنت كلب !!

 بس واجهي ده من غير انفعال زايد عن الحد يخليكِ تاخدي قرارات انفعالية وتتصرفي بطريقة مراهقة ونزقة مش شايفة غير تحت رجليها !!

 أنا ممكن أقعد أعددلك أسباب كتير لكراهية الحياة. بس ده مش معناه خالص انّي ما أبقآش شايفة أنا رايحة فين ، نفسيّا قبل عمليّا. خليكِ واعية أكتر من كده .

أهدى ......................

حولّي الغضب لحزن ! عشان الحُزن فعل راقي !!! ( هو امتي الحزن كان فعل راقي!! انا شيفاه انه فعل ابن ستين كلب !!!, ان لم اكن فرفوشه لوددت ان اكون فرفوشه  ).

 في حين الغضب فعل شيطاني بيجرّك لتحت !! ( طب ما انا حاسه اني تحت!! , بس هو تحت بعمق قد ايه ؟؟, و لو قررت اطلع هاخد قد ايه !! و يا تري كويس اني تحت علشان ابقي فوق بعدين و لا الصح اني ابقي فوق دايما و ما اسمحليش ابقي تحت !!

 ما تتجاهليش مشاكلك النفسية أبدا .. وما تتكبريش على احتياجاتك !! ( حتي المتفاوت في القبح !!)

 بس أبدا أبدا ما تعمليش حاجة كرد فعل .. خلّي الحاجات تبقى أفعال طالعة من جوّه .. مش مجرّد رد فعل .. ( ايمائات مستحسنه).

وخليكِ واعية لقيمتك ولكينونتك نفسها .. ومهما حصل، اعرفي ان كلّه بيعدّي .. فما تعمليش حاجة تندمي عليها قدّام ..

 وشكرا :)



ده
   كان
       كلامها!!!!!!!

تقريبا خد في قرايته دقيقتين .
         ناهيك اني قريته اربع مرات .
                 و احتمال يكون خمسه, و مش عايزه اعترف بده !!

                                            هو انا فعلا كده !!


انا خايفه !!!!!!!!!!!!!!!!!!!!!!!!!!!

خايفه اكون كده و مش عارفه , خايفه ما اكونش كده و ضيعت وقت في قرايه كلام عن حد غيري , خايفه اكون انا و يكون صعب اتوصل لحل فيا بكوني انا دي . نهايه القول اني فعلا فعلاااااااااااا خايفه !!!! بس خايفه !!!!!!!!!!!!

الجمعة، 28 أكتوبر، 2011

يبقي الحال علي ما هو عليه !


.
.
.
ايامها الكتير بقت قليله , قليله اوي بشكل مش مرضي !
.
.
.

زمان و انا صغيره كنت بكتفي بنص جنيه كمصروف ليا , عمري ما فكرت اطلب من بابا اكتر !!.
كنت عارفه انه قليل , اصل مصروف نهي صاحبتي جنيه و نص , اما حسام فكان تلاته جنيه , اصله ولد وحيد علي بنتين !!! 
 بس كنت بحس باني في اختبار كبير, و كوني بقدر اتعايش بيه, بثبت قد ايه انا شاطره , و بطلع لكل اللي حواليا لساني, اني قدرت بمصروفي ده اجيب (ملبس ( ارواح) , طوفي فواكه , لبان , كيس شبسي صغير اكله مع ساندوتش الجبنه اللي من غير خيار )!!!.
.
.
كنت و لا زلت بحب الحجات الصغيره اكتر من الكبيره !!
جمال الحجات الصغيره لسه كله ليا انا !!
 الحجات الكبيره الكل عرف مدي جمالها, و خدوا منه كتير , الكل عارف ان بورتو سخنه جميله !!, بس مين يعرف ان ريحه دولاب اودتي الخشب, مع كوبايه الشاي باللبن, و انا سانده راسي عليه الصبح و بقري كتاب ما , بيحسسني اني متدفيه في حضن حنين اوي , بلاقييني فيه جدا, الحضن ده مش بيخوفني المره دي, علي غير العاده يعني !!!.
بيخليني متونسه اوي وانا بسمع صوتي بيقرالي ,بهدؤ و حنيه يوم في بدايته لسه , ايا ما كانت الساعه كام !! انا بكره التقيد بفكره الصبح و الليل !!
.
.
.
كان بقالها يومين فعليا كل ما تفتح فايل وورد , تحسه اضيق من انه يستوعبها !
ما بتردش علي تليفونات اقرب كائنات الارض ليها!! , كونها بتعمل كده بيحسسها بتقل اكبر في اللي جاي بعدين! , طب هي لامتي هتفضل باعده صاحبتها عنها ؟, و صاحبتها لامتي هتحلل ده علي انه حاله و هتعدي ؟, طب هي ممكن تخسر اعز مخلوقات الارض ليها, بتصرفها اللي ممكن كتير يقولوا عليه طفولي ده ؟؟ بس هي فعلا مش قادره تتكلم ولا تشكي !!!

اذا يبقي الحال علي ما هو عليه !!
.
.
.
حاسه انها محتاجه لايد قد جناحات طائر الرخ ,تطبطب عليها و تقولها هتبقي كويسه , انتي اصلا شطوره !!
 هي مش بالبساطه دي علي فكره !!, اصل مافيش طائر رخ اصلا!! , يعني هي بتدور علي السهل الممتنع!! , محتاجه ضمه, مجرد ضمه !! بس من طائر رخ خرافي !!.

اذا يبقي الحال علي ما هو عليه !!
.
.
.
هتفضل تعامل النص جنيه علي انه مغامرتها لاثبات انها شطوره !!
          و يفضل تليفونها يرن يرن يرن , و هتفضل بردو تخاف انه يبطل رن!! 
                     وهتفضل تدعي انها تقابل كائن رخ , هي اكتر واحده عارفه انه 
                     خرافي!!

 زيه زي قدره النص جنيه انه يجيب حتي كيس شبسي !! اصل كيس الشبسي بقي بجنيه !!! .....

الجمعة، 14 أكتوبر، 2011

نعم للتلقائيه!!


كان الموقف ادعي للسرد , رغبه مني في التذكر لا اكثر او اقل !! .

كان يوما علي غير الترتيب بنتيجه اعمالي الورقيه , لا اتذكر عنه الكثير, سوي كوني ارتديت ملابس اقل من المستحب ثقلا , لامتع جسدي بشعور البرد و من ثم الدفء علي احدي قارعات الموقف !!, فانا استهوي بالدفء البرد المسابق له الي جسدي !!.

كنت قد تاخرت بهذا اليوم عن موعد التقائي بذاتي , فانا املك اياما بتظليل وردي في اجندتي, اسميها يوما مع الذات !!, اجلس بصحبتي ,و اتمتع بحنين مصاحبه احدي رواياتي اللا مستنزفه من قبل ايا من تجاربي , نعم اريدها جديده دون ادني توصيه من اصدقائي , اقاربي بكل تاكيد !,اهلي ليسوا بخيارا علي اغلب الظن ,فمعظمهم لا محبين لاضاعه الوقت بالقراءه !!!
......................................

جلست باحدي سلينتروهات القرن , فانا اعشق البراوني خاصتهم مع الكابتشينو العبقري !, يشعرني باذابه لاعصابي و بحثي عن عالم وندر لاندي ما , اشتاق له بين قضمه و اخري تليها !!. كان مكتظا ذلك اليوم علي غير المتوقع بايام السبت , شتتني الحضور عن تكوري بركني المزوي , المحبب علي كنبتي الفضلي !.
 هكذا كان هو !! , يجلس قرب صديقا له, يستذكر علي اعتقادي لامتحان ما لكليه ما !! فقد كان يتدثر بكم لا محدود من الاوراق !!.

منذ اخر لقاء لاحدي صديقاتي المقربات المحبات لتحليل الاشخاص, صار من السهل تحليل ابعاد اي كيان ما امامي من هندامه , جلسته , حركات يداه , نظارته الطبيه !!!!, حللت الوضع ,و استنتجت انه ضحيه لاحدي الكليات العمليه علي اغلب الظن , كحالتي !!! تشابه مبداي مريح !!! ,ساعه يده و من ثم حذائه ,يخبراني بانه لمن اسره مرفهه !!.
 كانت نظارته الطبيه تستهويني ! فانا من عاشقي مرتدي النظارات !! ليس لشيء و لكنها مجرد ذكريات طفوليه و وجهات نظر لا مستحدثه !!, يقنعونني بجديه اساريرهم في الفرح و الحزن ! , فانا اعشق من يعطي كل زي حق حقه , للفرح وقته و للحزن وقته هكذا !!.

عاده ما تتلبسني روح الفتاه اللا مباليه باوقات كتلك , فانا اكره ان تصرخ ملامحي باعجاب ما !, قد يقوي علي جرح كبريائي الانثوي اللا مبالي بالتاكيد !!.

 قررت ان اتخذ القرار الاصعب لاول و قد تكون اخر مره ,اعتدلت بجلستي , و انزويت بزاويه اعلم مدي تاثيرها علي محادثيني !,اشرفت علي وضع ساقا علي ساق, و قررت ان الفت انتباهه الي خلخالي العبقري بقدمي اليسري !!. حاصرته بعيناي , فما كان منه سوي ان يتجاوز عن الصمت و يتكلم بنظره مراوغه ما قد تستميلني !, فليس لديه سبيل ليتحدث شفهيا باي شكل ايا كان !! فلن اسمح بخطوه سريعه كتلك في مرحله كتلك , فانا من محبي الترتيب المقنع , انها مرحله الصمت يا صغيري ,اذا فلتدعنا نمرح قليلا في صمتنا !!.
تلبسته روح المحاصر! , فصار يحيطني بروح ما اعشقها !!, روح اعجابيه لا شهوانيه , ريحها عطر لا يثير شعيراتي علي العطس ,و الرفض كبنت مهذبه !!.
....................................

توقفت عجله الفيلم عند تلك النقطه!!!!!!
 تسائلت في هدؤ!! , ايا منا سيتخذ خطواته نحو الاخر !! . تدبرت حالي و صارحتني بكوني جديده بهذا المنوال من البوح !, تلكلكت بذهني صور شتي و ساقتني لاقصي الحلول سلميه .
 ان اترك لذكوريته القرار!!!, بينما اتمتع باحمرار قلم قرار الموافقه او الرفض!!, صدقوني تلك هي الطريقه الاسلم !, لتسترضي غروره و لا تظهري بخبره زائده قد تصيبه بالتشويش !,فقد يظلمك و يتطلب منك بما هو اكثر من قدراتك ,و حينها ستشعري بخيبه الامل , في عيناه و صارخه بعيناكي !!, او خبره اقل نبعه من توتر الموقف , قد تؤذي يقينك بذاتك, كونك تستطيعي  ان تستميلي رئيس جمهوريه ما ان اردتي!!!

كانت حيرتي تصله بشكل او باخر!! , لا يهينني علي الاطلاق !!!.

 رفع هاتفه في صمت ,في لفته مرحه تخبرني بان افتح بلوتوث هاتفي !!, كنت قد توهمت باحدي لقطات افلامي المقربه , اذ يتخذ القرار بان يسرد هاتفه مع كلمه رقيقه علي احدي وريقاته المبعثره في الانحاء, و يرسل بها مع نادل الكافيه !!.
 لما لم يفعل ؟
      لعله لا يمتلك ورقا ببراح خيالي !
            او لربما لم يكن من محبي الافلام !!.
 علي اي حال ها هي عدوي الاتصالات تفعل فعلتها في قمع خيالي !!!. فتحت بلوتوث هاتفي, و بإمائه مرحه و بسمه خاطفه نطقت اسمه !!
 s    a    m   a   :)
ما ان تلقي الخبر حتي تداعي عن عيني الي هاتفه يرتل صلاه ما , سمعت صداها برنه مرحه لنقالي !!!,( لم اعلم بان هناك من يبجل الخلخال مثلي , خلخالك اروع من الرائع :) ) . انفرجت اساريري بالتاكيد, و لكن جاء صوت عقلي يؤنبني!!, باي بسمه يا تري ستلتفتي له ؟ , ان كانت اخاذه فقد تساق له لفته كوني خبره بامور كهذه و هذا قد يهينني !! , و ان كانت اخويه سينأي عني و قد اخسر تلك الدعابه الي الابد !! .
 بعد تفكير مضني قررت ان اعلي شعار ( نعم للتلقائيه !!) , هكذا كنت اتلقي معه رده فعلي, فقد كانت مفاجاه لي قبل ان تكون له !. ابتسامه اخاذه ,و توتر بسيط في حيز استبدالي لساقي الاخري علي ساقي !!.
..........................................................

كانت عيناه تحيطني بسؤال لا اقوي علي الرد عليه !!

                              ماذا بعـــــــــــــــــــــــــــد !!!!!!!!!!!!!!!!!!!!

 كانت الفكره السابقه من ترك القرار له و من ثم التصديق!, دربا من الجنون , لا بد ان اتخذ القرار و اتحمل تباعياته !! ,فلا اقوي ان اكون بعيناه فتاه ممله !!.
 كان ذهني مشوش جدا ,لاسترجع مشاهدي و اختار فيما بينهم ما يرضي كبريائي !! حافظت علي ان يكون توتري سجين نظراتي ,و ان احافظ علي تحركاتي , متزنه , هادئه , تائهه بكل صدق !!

و من ثم جاء قراري قاطعا !!!
       استدرت في جلستي!!
                عدلت من وضع الكرسي المجاور!!
                        ابتسمت و امئت بهدؤ بان ينضم لمجلسي !!!

رفعت خصلاتي بهدؤ و ببسمه اخاذه نطقت , اهلا بك في عالمي !!!!
لم ارتب لاي و كل شيء و للمره الثانيه في نصف ساعه اعلنها من جديد .

                            ( نعــــــــــــــــــــــم للتلقائيه!!!!! )


السبت، 8 أكتوبر، 2011

شكراايها القدر !!


عــــــــــــــــــــــــــــــــاده, بيكون تحققي من الواقع ,متاخر بثانيتين عن واقعه حدوثه , لهذا اقتنع تمام الاقتناع باني ساموت تحت عجلات سياره ما , مررت امامها و في غفله من سائقها حافظ علي سرعته !! , بينما انا لم احافظ علي سرعتي و اصابتني الدهشه بالصم و الشلل الكلي المعتاد مني بمواقف كهذه , و بذلك سيسيل دمي كدليل علي ان في العجله لا تكمن الندامه دائما,و بهذا ساثبت بموتي نهايه فكره ما و لنسميها ثوره بشكل او باخر !!!, يعجبني هذا السيناريو كثيرا !!, ان تضحي موتتي درسا لمن بعدي , هكذا اتمني ان تضحي حياتي ايضا !!.

..............................


مررت بيوم اقل ما يوصف به كونه مربك , احداثه قليله لكوني لم احافظ علي الاكثار منها !, فانا اقتنع باني سيده يومي , بيدي اقيده ممتليء علي بكره ابيه ,و بيدي الاخري امسح ما امتليء به بيوم اخر اقل طاقه , اليوم كانت طاقتي لا مضويه علي الاطلاق ,فقط تكفيني , و قد تكفي من هم قرب من المقربين , لا اقوي علي مقابله من هم علي مسافات متباعده, فقد يرهقني تصنعي معهم, تصنع كوني في افضل حالاتي !!!!, استيقظت بوقت متاخر , لكوني نمت بوقت مبكر جدا باليوم السابق !! مبكر اي يحافظ علي بكاره اليوم و ليس بكاره النوم ذاته !! فقد نمت في حوالي التاسعه صباحا , لاستيقظ حوالي الثالثه و النصف عصرا , اكره ان يحال اليوم الي ساعات معدوده و افتقد فكره طول اليوم و بركته لتتسع لي بكل الواني المرئي منها و المسموع و القابل للشم ,فان اناس كثري بجسد واحد . انتهي اليوم بتلك الفكره قبل ان يبدا ! اكره ان ينتهي اليوم عاده , رتبت بالامس ثلاث لقائات مع اناس اعشق مجلسهم ! بهذا اليوم المخرب , قليل العمر,علي ان اتنازل عن بعض من المرح و اكتفي بالبقيه الباقيه !! الرضا فكره تؤرقني جدا !! درست الظروف المتاحه و الخطط القابله و اللا قابله و قررت ان يكون يومي كالتالي , لقاء لاصدقاء لوقت قصير , اتبعه بلقاء لانسي اتابع معه فكري الحياتي بيقين الونس , و من ثم ببروفا مع اناس اعشق تقاسمي للفكر معهم( الفكر اللا معلن عاده لابقيهم مميزين بيني و بين حالي ) , و من ثم العوده للمنزل لل........................ ! فراغ !!

امجبره لارضي بهذا الفراغ !
 ,لا تكوني ملوله و لتكوني فتاه مطيعه لصيغه ما للقدر لا تعلميها !!
اكره تلك الفكره , تنجح تماما لان تخرج الملحد بداخلي !!.

...................................

منذ مده لم اقتنع بان للسرد سحر ما ,سوي لان تقاسمته مع من شعرت بكونه يبالي بسردي قدر مباليتي به , توقعت كثيرا هذا المشهد ,كوني زوجه ثرثاره تحكي لزوجها بكل يقين كونه يسمع ,ما حدث بيومها , بينما لا يقوي سوي علي الهمهمه التي لا تفقده تركيزه في متابعه الكره في الملعب !!! كرهت تلك اللقطه ,و كرهي لها اجبرني علي الصمت !! فقط ساصمت و لنتابع سويا في هدؤ , اكتشفت بعد حين بان القرارات السوداء منها او البيضاء ايضا , تضحي لا حياتيه علي الاطلاق , اي غير قابله علي التنفيذ علي ارض الواقع , لنعلنها رماديه لتكون اكثر انسانيه!!!!! .
اذا قرار حياتي رقم ... ساصمت و اتكلم بين حين و اخر ,ساسرد و من ثم اصمت هكذا , و ليتابع الكره في الملعب كما يشاء !!!

...............................

اثناء تنفيذي لخطه يومي التي اسقطت لقائي الثاني و اكتفيت بلقاء الاصدقاء الاول و من ثم البروفا !!!! حدث ما اكره دوما !!, مفاجاه لا محسوبه المقدار , لقد مزق حذائي ( ذات الصباع الاوحد !!!:)) اثناء صعودي علي سلالم المترو , لم اعلم ماذا افعل لان حركتي به عدت مشلوله جدا , لا اقوي علي تعديه الشارع لاي محل قد ينقذني , لا اقتنع بان لا حلول اخري لدي !!!, علمت باني ساتخذ اول تاكسي امامي و لينقلني لاول محلات الاحذيه و لنعلنها ثوره اخري علي احادي الصباع هذا !! ,رغم كوني احبه !! .
وجدتني احنو لان اشارك موقفي مع كائن اشعر نحوه بدفء ما !!! اتصلت بصديقتي التي كنت قد تركتها من وقت قليل , لم انتظر منها قرار ما او اخر !!, فانا سيده قراري و قد رتبت المشهد كله باقل خساير ممكنه مسبقا , فقط اردت ان اصرخ , لقد مزقت حذائي الذي احبه ,و لا اقوي علي الحراك من مكاني !, وحدي بالشارع , حولي اناس لا اعرفهم ينظرون لي في شفقه تسلخني !! , يا له من عالم لا مبرر !!!!, ردت بكل ود اعشقه منها ,و تابعت خطتي انا!!.
اثناء عمليه البحث , اتاني هاتف اكثر دفئا !! اعانني علي الونس بكل جد و لعلعت ضحكاتي بالاجواء بلا ادني ترتيب مني , لقد اخللت بخطتي يا هذا !!, لم اشعر بالضياع ولا ادني تخبط  اثناء بحثي عن حذاء بينما اجرجر اقدامي !!, ناقشت معه الوضع الحالي, و تقاسمنا ضحكات مرحه و مشاهد سينمائيه احببناها !!. احنو لان اسمي تلك المهاتفه هديه من القدر !! اشكرك ايها القدر !! .
 انقذت الموقف باقل خساير. و تبقي معي من النقود عشرين جنيها و بعض الفكه , مما يعينني علي يوم تقليدي بلا ادني اراقه لماء الوجه !.

 تـــــــــــاكس , عماد الدين لو سمحت 
 عماد الدين لو سمحت 
 انتي رايحه فين , عماد الدين !! اركبي :)
ميرووو, قوليلي مبروك علي الارض انا جبت الشوز!!! ,
 مبروك يا روحي كويس انك اتصرفتي !,
 مبروك يا انسه علي الارض!! ,
 ميرسي ( بنظره مقتضبه و انت مال اهلك خليك في طريقك و انت ساكت !) ,
انا اتصرفت انا شطوووره ,
 شطور يا سمسم انتي عسل !!,
ابتسامه راضيه اكملت بها طريقي للبروفا !!!!! عاوز كام ! ,
اللي تدفعيه ,
 الكوينز تكمل تلاته جنيه مرضي !! ,
 لا ,
خلاص خد و هات الباقي ,
 دي اصلا خمسه جنيه !!!
صمــــــــــــــت , انا اتنصب عليا !!
 كويس اني ما اخدتهاش منك حطتها في جيبي !!
خلاص خير !!
امشي بلا ادني ايقاع و مع دراسه مبدئيه للموقف , معايا اللي اروح بيه , اذا شكرا للمره الثانيه ايها القدر !! .
بصيت للسما ,و من غير اي توابع قفلت سماعه الموبايل, و قررت اني مش ههرب باغنيه ما علي الموبايل تفرحني و باني هدرس توابع كل المواقف !! اه دلوقتي و فيها ايه , ده كان اثناء طلوعي علي السلم للبروفا فعليا ! سلم طويل , مرهق , انتهي اسرع من الريح لاني مركزه اني اطلع سلمتين , سلمتين , وسط دايره التفكير الكبيره , الوقت و المسافه عدت اهوي من الهوي !!!
قبل ما اوصل لباب البروفا . لقتني بصوت عالي شويه بقول ( بس علي فكره انت ابن كلب حرامي !!! حسبي الله و نعم الوكيل , انا متاكده انهم كانوا عشرين جنيه !!!).


انتي جيتي !
اه ( نهجان السنين و نفس رايح تماما ) ,
 طب استني ادخل الاول لاني بعمل ارتجاله و بعدين ادخلي !!!,
تركيز صفري القدر, حاضر .
تك
  تك
     تك , ابتسامه مشرقه , سوري اني اتاخرت!!! فاتني كتير في البروفا !!!!!!!!!!!:)

      بس اللطيف اني اقولك اني قررت اتبسط  بردو بصيغتي الجديده دي !!!!!
          و, و , و ,و بــــــــــــــــــــــــــــــــــــــس !!!!!!!!!!!!!
شكرا ايها القدر !!!!

حضن فى غربة
ملمس مثير
بعد مشاغبة حاترقلك
مرة فى مرة حاول كتير
اى مغامرة راح تنفعك
وفى الحلم وقتة فى سكون
لو بطلنا نحلم نموت
حبة صبر حبة
حماس
يبقى الحلم صورة وصوت
لو بطلنا نحلم نموت
رقصة شهية هى الحياة
دى
العشقية والمعشقة
مرة فى مرة حلمك هواك
يملا الدنيا بالزقزقة


دي الاغنيه اللي هدهدتني طول طريقي للبيت , بعد تليفون ماما الهجومي بتاع انتي فين يا هانم !!!!

   حبه صبر حبه حماس يبقي الحلم صوره و صوت !!!



الأحد، 2 أكتوبر، 2011

عندي مشكله !!, لا مش عندي !!



عندي مشكله , لا لا مشكلتين ! لا هم تلاته و بس بقي !!!!


عاده بدخل مع نفسي في مهاترات تحديد اطار لشخصيتي بحدود محدده ,( في رايي ده منتهي التيه لاني لا محدده اطلاقا , انا هلاميه اوي !!! و شعوريه بشكل مرعب ) . لكن اهوه بردو !!, علشان لما حد يسالني انتي مين!! او علي راي زوزو في فيلم خللي بالك من زوزو ( من انت ؟؟)  ابقي جاهزه برد منمق و لطيف, و الاهم من كل ده انه يكون مفهوم و قابل للاستيعاب !!!! .

في الفتره الاخيره, زادت اوي الظاهره دي( ان الناس تطلب مني تفسير لكلامي بصوره اقل تعقيدا !! ده كلامهم ) , فانا عاده في رايهم ببقي مش مفهومه و بيتهموني باني بتفلسف !! , فعليا عمري ما حاولت اعمل كده  عن قصد , لاني بكره الاصطناع في العموم !!!

 فسرت كتيرالموقف بتفسيرات مش مقنعه !!! , و بدات افكر بيني و بين نفسي فعليا , في اسباب  كوني وصلت لهذا المجال المغناطيسي ,لاجلب لي كل هذا المدد الانساني و الروحاني و الالفه مع الاشياء اكتر من البشر في احيانا كثيره , مع احتفاظي بامكانيه تكوين ونس انساني يستحق ان تتقاسم معه وقتك :), لكن وجدت انه لا سبيل لتكون انت كما انت ,مع اناس اعتادوا ان يحفظوا و من ثم يسمعوا ما حفظوا ,و من ثم يشعروا بفراغ عقلي ما لا يستهويني !! بكره الفراغ اللا محدد بقانون ما للتامل!!! 

تفصيل ما سبق !! بقيت الاقي نفسي مع الحجات اكتر من البشر ,و بقيت اكون منهم كائنات في عالم ما محبب الي !! مش منطويه لاني لا زلت بحب الناس برعب و بحب اذوب فيهم و اتمتع جدا بتفاصيلهم و مشاكلهم حتي !! اعتراف( كتير بتلهيني عني و الاقيني بكل فخر بحل مشكلتي من منطق اوسع !! كاني بحل مشكله ليهم مش ليا !!!).

من فتره قررت اكتب انا ايه مشاكلي و ايه مزايايا !! لقيتها نسبيه اوي !!, لاني كتير بحبني في مواقف , بكرهني فيها اوقات تانيه, و كتير بتفق مع نفسي ان ده اسعد وقت بقضيه في حياتي,و اكتشف بعد ثواني ان الوقت ده لم يقترب حتي من نص الطريق لليقين التام بالسعاده !! , علشان كده قررت اركز في نص كوبايه مليان مرمي في اي ركن من اركان اودتي ,و اتكلم عني من غير لا فصله, ولا علامه تعجب, ولا نقطه و من اول السطر , للاسباب التاليه !! لو اتكلمت عني هملي الورقه علامات تعجب !! و لو اسردت هترفع عليا الورقه دعوه باكسترا اكسترا فصلات من كتر الرغي اللي ما بيتقلش عاده , و لو قررت اشتكي بقي او احكي عن حاجه مش عايزه احكي عنها , هتلاقي الورقه كلها نقطه و سطر , و تقريبا مش هتلاقي كلام !!.

قلت اجيب من الاخر !!!! معايا !!!  



بحبني لما !!!
- لما بلفت انتباه طفل في المواصلات ,و يبتسملي من غير ما اعمل اي جهد اني الفت انتباهه, بحبني اكتر لما يرفع ايده ليا و يحب يجي معايا باي و يسيب مامته , بحبني لما الفت انتباهه باكسسوري ما لبساه, و يقرر يتشغل بيها طول الطريق, و مش يعيط ولا يعمل حاجه اكتر من انه يفرك علي رجلي !! ما عنديش مشكله في الفرك انا لاني كائن فراك:), ممكن اقولها بصوره تانيه بحب الصدف اللي بتغير طعم يومي .

- لما بنسي حطيت فين ريموت التليفزيون, و بنسي دايما اني اكيد حطاه تحت المخده , اثناء طمتيعه قططيه من طمتيعاتي , ده تعليق ماما علي طمتعتي :)

- لما ابقي في وسط خناقه او زعيق ما مرهق جدا ليا, و يحصل موقف ما ينسيني كل حاجه و اضحك , الغريب انه ضحك من القلب فعلا , مش بعرف اصطنع ضحكه ملعلعه من بتوعي :)

- لما ابقي عامله حاجه حلوه و الاقي ماما و بابا مبتسمين في وشي, من غير كلمه عتاب ولا لوم تبوظ عليا الحلو اللي عملته, و من غير ما امثل دور البنت اللا مباليه باهلها, لاني مش بعرف ابقي لا مباليه بيهم مهما كنت قويه !!

- لما اصحي من النوم, و احب ابص اول حاجه علي المرايه و انا منكوشه, و ما انساش ابتسم اوي بنص عين مفتوحه ,و ابتدي ارتب نفسي و انا بغني و اقول صبح الصباح فتاح يا عليم :)

- لما الاقي حد مقابلني في وشي مكرمش وشه بقصد !!, لاني احيانا لما بستغرق في تفكير ما اثناء ما انا ماشيه ,بعقد حاجبي !!!! ,و ما يفردش وشه غير لما افرد وشي و ابتسم قبله!!, هو لا بيعاكسني ولا ليه امل في الموقف اكتر من اني ابتسم و بس , بحس ان الدنيا لسه بخير !!!

- لما بدعبس عن اسامي مغنيين قدام او فنانين راح عليهم , و الاقي بين اغانيهم او بين افلامهم عبقريه الونس الحقيقي , بحس اني بديهم جزء من حقهم و انا بقول عليهم رائعين , مع انهم بكل اسف ماتوا و مش سامعني !!!

 ........................................................

بكرهني لما !!!
-لما  بصدق كلام الناس الهدام عني و ابتدي افكر بدونيه مش بتاعتي !

- لما ابقي ماشيه بلا ادني تخطيط و احس اني موجه تشيلني و موجه تحطني . بكره اكون تبعا لقوانين مش قوانيني !

- لما في وسط زحمه فكر او شغل اسقط ناس فعلا بحبهم , و ابقي مش عارفه ارضيهم ازاي لاني فعلا مش نسيتهم بس اتشغلت عنهم !و ابقي شايله هم اني اكلمهم و يعاتبوني فما اتكلمش !! و تزيد الطينه بله !!!

- لما اقول لحد اقفل دلوقتي و هتصل بيك بعد شويه و انسي!! , احتمال ده اللي بيخليني ما ازعلش من حد عمل معايا نفس الموقف, مع انه في رايي موقف يستاهل الدبح للي يعمله !

- لما بتاكع في قطع علاقتي بناس عارفه انهم مش ليهم لازمه في حياتي , خوفا علي مشاعرهم, و بنسي اني بكده بهلك مشاعري انا , و بتبقي النتيجه وخيمه اوي عليا و عليهم .

- لما بفشل اني ابقي اندر كونترول, بمشاعري بسلطاتي ببابا غنوجي , و تبقي النتيجه اني اتعصب علي حد قريب مني غصب عني و صوتي يعلي , بكرهني و انا بزعق و صوتي يتبح من الزعيق , بكرهني و انا مكشره , بكرهني و انا مش شبهي !!

- بكره عدم معرفتي لمدي عمق الحياه في اوقات كتيره و احسني تايهه مني فيا , و بحبني اني رغم ذلك بفرد دراعاتي و انط فيها , و بحب اني ما بندمش كتير علي جناني , و بكره لوم القريبين مني علي جنوني ده .

- بكره لما ابقي في ركن اللي بيبرر , بكره صوتي و انا ببرر ,و بكره الحد اللي اجبرني اني ابررله اي حاجه .

.....................

بحبني و بكرهني في اللقطه دي, لما قررت اني اوقف لاني اكتشفت اني سردت ثمن حجات بكرهها قدام ست حجات بحبها , فهمت ساعتها اني بكده مش حقيقيه , لان النتيجه في الاخر اني بحببني مش بكرهني !!! بكره كرهي ليا اوقات ما و بحبني محبوبه ليا !!! دي الحقيقه !!!

اصــــــــــــــــــــل , صاحبتي الاقرب اللي فاهمه عيوبي دايما ,و صوت ضميري اللي كتير بغفله و ارجع اسمعله بتمعن , هي بنوته بنت حلال اوي بحب اقول عليها سمسمه, و في مقوله اخري سميحه !!

بي اس !!!! 
لو حد حب يقول عليا نرجسيه افعوانيه مهلبيه بحب نفسي!!!! , يقول زي ما هو حابب , انا من موقعي ده قررت اني بيا هقدر احميني من زياره اي دكتور نفسي , يا رب بس اقدر و تقدروا انتم كمان:)